فسوں کاریاں

 ایک چیز جو اندر ہی اندر رگینڈاس کو دق کرر ہی تھی۔ وہ کراؤس کی مصوری کا ناقابلِ اصلاح عامیانہ پن تھا جس کی وہ حسبِ منشا تعریف نہیں کر پاتا تھا۔ اس نے خود کو قائل کرنے کی کوشش کی کہ روزمرہ کی مصوری کے لیے زیادہ با صلاحیت ہونا لازمی نہیں ہوتا۔ کیونکہ یہ ایک ضابطے پر ہوتی ہے، مگر اس کا کوئی فائدہ نہ ہوا؛ اس کی تصویریں بے مایہ تھیں۔ تاہم وہ اپنے دوست کی تکنیکی مہارتوں اور خوش مزاجی کی تعریف کر سکتا تھا۔ کراؤس نوجوان تھا اور اس کے پاس ابھی زندگی میں کسی اور رستے کے انتخاب کا وقت تھا۔ دریں اثنا وہ ان تفریحی دوروں سے لطف اندوز ہو سکتا تھا۔ یقیناً  ان سے اسے کوئی خطرہ نہیں تھا۔

 کراؤس اپنے تئیں رگینڈاس سے مرعوب تھا۔ اور دونوں کو ایک دوسرے کی صحبت میں جو لطف ملتا وہ اس ارادت مند کی لگن کی نسبت سے کہیں زیادہ تھا۔ ان کی عمروں اور صلاحیتوں کے درمیان فرق زیادہ واضح نہیں تھا۔ کیونکہ رگینڈاس پینتیس سال کی عمر میں بھی ایک لڑکے کی طرح ڈرپوک، نسوانی اور بے چین تھا، جب کہ کراؤس حوصلہ مند، تحکمانہ اور معتدل مزاج کا حامل تھا جس کی وجہ سے ان کی عمروں کا فر ق سکڑ گیا تھا۔

پندرھویں دن انھوں نے دو آبہ پار کیا اور ڈھلان اترنے لگے، ان کی پیش قدمی تیز ہو گئی۔

انھیں خدشہ تھا کہ وہ یومیہ اجرت پر کام کرنے والے گائیڈوں کی طرح عادی کوہ پیما بن جائیں گے اور گائیڈز کی اجرت بڑھتی رہے گی۔ تاہم انھیں ان کے فن کی مشق نے اس خطرے سے محفوظ رکھا۔ بہر کیف کبھی کبھی وہ گرد و نواح میں گھومتے پھرتے اور مظاہر فطرت سے شناسائی حاصل کرتے۔ اس کا معکوس اثر ہوا۔ گھوڑوں پر سست رفتاری سے چلتے ہوئے یا آرام کے لیے رکتے ہوئے ان کا زیادہ تر وقت فنی اور تکنیکی نوعیت کے سوالوں میں صرف ہوتا۔ ہر نیا منظر ان کی زبان کو حرکت میں لے آتا اور وہ اس کا انفراد تلاش کرنے لگتے۔

یہ یاد رہنا چاہیے کہ ان کا اولیں مقصد ضخامت پر مبنی وہ کام تھا جو وہ کر رہے تھے: خاکے؛ نوٹس؛ یادداشتیں۔ ان کے کاغذوں میں خاکوں اور تحریروں کی آمیزش تھی۔ ان تفاصیل کا تصویروں اور کندہ کاریوں میں استعمال انھوں نے اگلے مرحلے کے لیے مؤخر کر رکھا تھا۔ کندہ کاری کا کام گردشی ہوتا، اور اس کی ممکنہ لامتناہی پیداوار کا خیال رکھتے ہوئے محتاط رہنا پڑتا تھا۔ یہ چکر ایسے مکمل ہوتا کہ کندہ کاری کے گرد عبارت کا حصار کھینچا جاتا اور اسے کتا ب میں داخل کر دیا جاتا۔

رگینڈاس کے کام کی ستائش میں کراؤس اکیلا نہیں تھا۔ یہ ظاہر تھا کہ وہ عمدہ مصوری کرتا تھا ۔ اوراس کی بنیادی وجہ اسلوب کی وہ سلاست تھی جو اسے حاصل تھی۔ اس کی تصویروں میں ہر چیز سادگی میں نہائی ہوتی تھی۔ اس سے ان میں موتیوں جیسی آب آجاتی تھی اورجو انھیں یوم   نوروز کی طرح روشنی سے بھر دیتی تھی۔ وہ واضح طور پر قابلِ فہم تھیں اور ہیئتی قوانین کی تقلید کرتی تھیں۔ اور تفہیم زیادہ پیداوارکی موجب ہوئی۔ نہ صرف اس کی واحد مطبوعہ کتاب ’برازیل کا تصویری سفر‘ نے یورپ بھر میں خطیر منافع کمایا بلکہ اس کی تصاویر پوسٹروں اور تام چینی کی پرچوں اور پیالیوں پر بھی چھاپی گئیں۔

کراؤس اکثر کارڈی لیرا کی تنہائیوں میں اس غیر معمولی کامیابی کا ذکر ہلکے سے مزاح کے ساتھ کرتا۔ رگینڈاس مسکرا کر یہ ستائش، جس میں دوستانہ استہزا کی آمیزش تو تھی مگر کسی قسم کا طنز نہیں تھا، وصول کرتا اوروہاں ان کو دیکھنے والابھی کوئی نہیں تھا۔ اسی جذبے کے تحت اس نے اس مشورے پر غور کیا کہ ایکونکا گوا کا ایک خاکہ کافی کے کپ کی آرائش کے لیے استعمال کیا جائے۔ بسیط اور خفیف اشیا کو ماہرانہ پنسل کی روزمرہ مزدوری نے یک جا کر دیا۔

تاہم ایکونکا گوا یا کسی بھی پہاڑی کی شکل کو ایک خاکے میں قید کرنا آسان نہیں تھا۔ اگر پہاڑ کو فنکارانہ بے ربطیوں کا حامل ایک مخروط تصور کیا جائے تو تناظر میں ہلکی سی تبدیلی بھی اسے ناقابلِ تشخیص بنا دے گی، کیونکہ اس کا خاکہ یکسر بدل جائے گا۔

وہ مسلسل موضوعاتی دریافتیں کر رہے تھے۔ روزمرہ کی تصویر کاری میں موضوع بہت اہم ہوتا ہے۔ دونوں فنکار اپنی صلاحیت کے مطابق منظر نامے کو فنی اور جغرافیائی طور پر دستاویز کر رہے تھے۔

وہ عمود میں واقع جغرافیائی یاا رضی سمتوں کو کسی کی مدد کے بغیر خود سے سمجھ رہے تھے۔ کیونکہ وہ معدنی چٹانوں، سلیٹوں، کاربن کے ریشوں، ستونی بسالٹوں، پودوں، کائیوں اور کھمبیوں سے واقف تھے۔ مگر جب افقی سمتوں کی بات آتی تو انھیں چلی سے تعلق رکھنے والے اپنے گائیڈوں یا رہنماؤں پر انحصار کرنا پڑتا، جو کہ عجیب و غریب ناموں کا ایک بے تکان ماخذ ثابت ہوئے۔ ایکونکا گوا اُن میں سے ایک تھا۔

منظر نامے کو بناتا ہوا افقی اور عمودی لائنوں کا گرڈ، انسان کے بنائے ہوئے نشانات سے اٹا ہواتھا جو اپنی جگہ گرڈ کی طرح نظر آتے تھے۔ گائیڈ بغیر کسی التوا کے حقیقت کی طرف متوجہ ہوتے۔ متغیر موسم اور ان کے جرمن گاہکوں کی حماقتوں نے، جنھیں وہ عزت اور حقارت کے ملے جلے جذبات سے ایسے دیکھتے کہ اس میں بدتمیزی کا عنصر نہ ہوتا، ان کی اس دنیا کو جو انھیں بلا تغیر،  زبانی یاد تھی، ایک معمے میں بد ل کے رکھ دیا۔ جرمن، آخر کار، سائنس اور فن کو برابری کی شرائط پرباہم ملا رہے تھے۔ یہ ملاقات ایسا ادغام تھا جو کسی قسم کی بوکھلاہٹ کا شکار نہیں تھا۔ اور دو یکسر مختلف علوم کو ظاہر کرتا تھا۔

سفر اور مصوری دونوں رسی کے ریشوں کی طرح آپس میں بٹے ہوئے تھے۔وہ بتدریج راہ کی مشکلات اور خطرات کو پیچھے چھوڑتے چلے آ رہے تھے۔یہ جاننا واقعی خطرنا ک تھا اور اس پر یقین کرنا بہت مشکل تھا کہ یہی وہ راستہ تھا جس پر سارا سال مسافر، تاجر اور خچروں والے سفر کرتے تھے۔ کوئی بھی صحیح الدماغ شخص اس کو خود کشی کاکوئی طریقہ سمجھتا۔ فاصلِ آب کے نزدیک تقریباً دو ہزار کلومیٹر کی بلندی پر جہاں چوٹی بادلوں میں گم ہوتی دکھائی دیتی تھی۔ وہاں نقطہ الف سے نقطہ ب تک کا راستہ، دراصل ہر نقطے سے ہر  راستے کے غائب ہونے کا اشارہ کر رہا تھا۔

نوکدار خطوط، ناممکن زاویے، چٹانوں کی چوٹیوں سے نیچے کی طرف اگتے ہوئے درخت، عمودی ڈھلوانیں جو تمازت خیز سورج کے نیچے، برفانی چوغوں میں کھو جاتی تھیں۔ اور پیلے بادلوں سے برستے ہوئے بارش کے تیر؛ کائی زدہ رنگین پتھر؛ گلابی جھاڑیاں۔ تیندوے، خرگوش اور سانپ، پہاڑوں میں افسر شاہی ترتیب دیتے تھے۔ گھوڑے بدکنا اور لڑکھڑانا شروع ہو گئے تھے۔ اس لیے آرام کا وقت ہو گیا تھا۔ خچر تو دائما ًغنودگی میں ہی رہتے تھے۔

ابرقی چوٹیاں ان کی پیش قدمی پر مسلسل نظر رکھے ہوئے تھیں۔ ان مناظر کو قابلِ یقین کیسے سمجھا جا سکتا تھا؟ ان کی بہت ساری اطراف تھیں۔ یہاں مکعب بھی زیادہ چہروں والا تھا۔ آتش فشانوں نے آسمان کو داخلی آرائش سے مزین کیا ہوا تھا۔ طلوع اور غروب کے دھندلکے، خاموشی کے جسم پر کھینچے گئے وسیع بصری دھماکے معلوم ہوتے تھے۔ سورج کی غلیلوں اور بندوقوں سے چلنے والی گولیاں ہر گھاٹی سے ٹکرا کر واپس پلٹتی تھیں۔ سرمئی پہنائیاں، خشک ہونے کے لیے دائماًوسیع خاموشیوں میں پڑی رہتی تھیں۔

 ایک رات کراؤس نے کہا کہ اسے ڈراؤنے خواب آئے ہیں۔ اس دن اور اس سے اگلے دن ان کی ساری گفتگو خود کو مجتمع کرنے کے اخلاقی طریقوں کے بارے میں ہوتی رہی۔ وہ حیرت کے مارے سوچتے رہے کہ کیا کبھی ان پہاڑوں میں شہر بھی تعمیر ہوں گے۔ کیسا لگے گا؟

 شایدکچھ جنگوں کے اختتام پر سنگین قلعوں کو خالی چھوڑ کر، سرحدوں پر لگی باڑوں اور کان کنوں کے دیہاتوں کو خیرباد کہتے ہوئے چلی اور ارجنٹائنا کے باشندے شاید کسی دن یہاں آن بسیں اور یہاں آکے اپنی عمارات اور سازو سامان بنانا شروع کر دیں۔ یہ رگینڈاس کا خیال تھا۔ شاید اس پر اپنے آبا و اجداد کی بنائی ہوئی حربی مصوری کا اثر اب تک باقی تھا۔ دوسری طرف کراؤس اپنی دنیا داری کے باوجود کسی صوفیانہ نو آبادی کے حق میں تھا۔ اس کے خیال میں دوردراز کے تہہ خانوں میں قائم متصلہ معبدوں کا سلسلہ ان تنگ و تاریک گھاٹیوں میں بدھ مت کی نئی دنیا قائم کر سکتا تھا اور ان کے بجتے ہوئے بگل، یہاں سوئے ہوئے جنات اور بالشتیوں کو جگا دیں گے۔ ’ ہمیں اسے تصویر کرنا چاہیے۔‘ انھوں نے کہا۔’ مگر اس کا یقین کون کرے گا؟‘

بارش؛ دھوپ؛ دبیز دھند کے دو دن؛ سیٹیاں بجاتی بارش، قرب وبعید کی ہوائیں، نیلی بلور راتیں، اوزون کے جواہر۔ دن کے اوقات میں موسم کا مزاج متلون رہتا مگر غیر متوقع نہ ہوتا۔ ان کے سامنے مناظر بھی ایسے ہی تھے۔ ان کے سامنے پہاڑ، یوں تہہ در تہہ بلند ہوئے کہ ان کا ذہن انھیں از سرِ نو ترتیب دینے کے کھیل کھیلنے لگا۔

ہفتے کے بیشتر دن وہ بل دار اشکال کے مطالعے میں منہمک رہے۔ ان کی ملاقات ہر نوع کے خچر، گاڑی بانوں سے ہوئی۔ مینڈوزاسے آنے والے چلی اور ارجنٹائینی باشندوں کے ساتھ ان کی عجیب و غریب گفتگوئیں ر ہیں۔ حتّٰی کہ ان کی ملاقات پادریوں اور یورپی باشندوں سے بھی ہوئی، اور گائیڈوں کے چچاؤں اور سالوں سے بھی۔ مگر ان کی تنہائی جلد ہی بحال ہو گئی۔ نظر سے اوجھل ہوتے لوگ انھیں اپنے کام کی تحریک دینے لگے۔