فسوں کاریاں

(ناول کادوسرا حصہ  پڑھنے کے لیے یہاں کلک کیجیے)

مارفین اس کے دماغ میں جمع ہوتی جا رہی تھی۔ اس کی مدد سے اس نے دوبارہ اپنے فن کی مشق شروع کی اور اس نے اپنے روزمرہ کا معمول درد کُش اور ڈرائنگ کے اردگرد ترتیب دیا۔ یوں اس نے ایک طرح کی باقاعدگی حاصل کر لی تھی۔ اس کا ہیئتی مصوری کا ضابطہ ایک ایسی صلاحیت ثابت ہوا جو ناقابلِ تخفیف تھی۔ سینٹ لوئی کے عمیق اور وجد آفریں منظر نامے نے اس کی بحالی کی مشق کے لیے مثالی موضوع فراہم کیا۔ فطرت، اپنے انیس نباتاتی مراحل کے ساتھ، عدم کی روشنی میں لپٹی ہوئی اس کے تناظر میں ڈھل گئی: مارفین زدہ منظر نامہ۔

ایک فنکاراپنے فن کی مشق سے، حتّٰی کہ بدترین حالات میں بھی، بہت کچھ سیکھتا ہے۔ اور رگینڈاس نے اس معاملے میں ہیئتی مصوری کا ایسا ضابطہ دریافت کر لیا تھا جو اب تک اس کی نگاہوں سے اوجھل تھا۔ یہ موضوع کی تکرار پر اساس کرتا تھا۔ تصویر میں شامل ٹکڑوں کو بار بار اور جگہ کی تبدیلی کے بغیر پینٹ کیا جاتا تھا۔ یہ عمل فنکار پر بھی فوراً واضح نہیں ہوتا تھا۔ اس کی وجہ یہ تھی کہ ان ٹکڑوں کا حجم بڑی حد تک متغیر رہتا۔ و ہ ایک نکتے سے لے کر چاروں اطرا ف کے منظر پر پھیل جاتا (جس سے اس کی تصویر کی سمتوں میں بے حد اضافہ ہوتا)۔ مزید یہ کہ ان ٹکڑوں کا بیرونی خاکہ تناظر کی تبدیلی کے ساتھ اپنی شکل بدل لیتا۔ وہ تاؤ کے ڈریگن کی طرح بیک وقت بہت بڑااور بہت چھوٹا ہو جاتا۔

بہت ساری دریافتوں کی طرح یہ دریافت بھی خالصتاً اتفاقیہ محسوس ہوئی۔ مگر ایک دن شاید اس کی کوئی عملی توجیہ سامنے آجائے گی۔

آخر کار، فن اس کا راز تھا۔ اس نے اسے فتح کر لیا تھا اگرچہ اس کے لیے اسے خطیر قیمت ادا کرنا پڑی۔ اس نے اپنی زندگی کی ہر چیز سے فن کی قیمت ادا کی تھی، یہ حادثہ اور اس کے نتیجے میں آنے والی تبدیلی اس سے باہر کیوں رہتی؟ تکرار اور ردو بدل کے اس کھیل میں وہ بہ آسانی اپنی اس نئی حالت کو بھی خفیہ رکھ سکتا تھا اور کسی بھی دوسرے افسانوی مصنف کی طرح کام کر سکتا تھا۔ تکرار: بہ الفاظِ دگر، فن کی تعریف۔

بہترین ہونے کی یہ دیوانگی کیا تھی؟ اس نے یہ کیوں فرض کر لیا تھا کہ اعلیٰ معیار ہی اس کے کام کرنے کا جواز تھا؟ دراصل وہ معیاری کام کے بغیر کام کا تصور بھی نہیں کر سکتا تھا ۔لیکن اگر وہ غلطی پر ہوا تو؟ یا کسی غیر صحت مندانہ تخیل کا شکار ہوا؟ وہ باقی لوگوں کی طرح کیوں نہیں ہو سکتا تھا۔ مثلاً (کراؤس کی طرح) جو اپنی بساط کے مطابق مصوری کرتے اور دوسری چیزوں کو بھی اہمیت دیتے؟ اس نوع کا اعتدال خاطر خواہ نتائج کا حامل ہوسکتا تھا۔ یہ اسے دوسرے فنون کی مشق کی بھی اجازت دیتا—  یا جن کی اسے خواہش ہوتی—  یا شایدسب کی۔ زندگی براہِ راست اس کا ذریعۂ اظہار بن سکتی تھی۔

یہ مطلقیت اسے ہمبولٹ سے ملی تھی جس نے مصوری کے ذاتی ضابطے کو ایک آفاقی علم کی میکانیات کے طورپر تشکیل دیا تھا۔ مگر جزئیات نگاری کی اس میکانیات کو ان کی رنگ برنگی ترتیب خراب کیے بغیر توڑا جا سکتا تھا جن میں سے ہر ایک اپنے اندر مکمل عمل کی حیثیت رکھتا تھا۔

تقریباً دس د ن کے اندر وہ واپس مینڈوزا میں تھے (یہ ڈیڑھ سو میل کا سفر تھا)۔ وہ انہی گھوڑوں اور انہی راستوں پر سفر کرتے ہوئے انہی چھکڑوں کے پاس سے گزرتے ہوئے اور اسی گائیڈ اور اسی باورچی کی رفاقت میں واپس پہنچے۔ جو ایک چیز تبدیل ہوئی تھی وہ رگینڈاس کا چہرہ تھا۔ اور سمت تھی۔ انھیں بارش کی وجہ سے کچھ تاخیر کا سامنا ہوا۔ تاہم، ہوا اور راستے کے باقی مناظر ویسے ہی تھے۔

گوڈوئے خاندان کے لوگ، جنھیں اس بھیانک حادثے کے بارے میں کچھ عرصے قبل مطلع کردیا گیا تھا، اپنی میزبانی کا اعادہ کر رہے تھے۔ مگر انھوں نے ذہانت کا ثبوت دیتے ہوئے مصور کے لیے ایک الگ کمرے کا بندوبست کر دیا تھا جہاں وہ خاموشی اور سکون کے ساتھ اپنے میزبان خاندان کی ایمانداری اور دیکھ بھال سے لطف اندوز ہو سکتا تھا۔ اس کا کمرہ چھت کی بلندی پر تھا۔ درختوں میں گھرنے سے قبل یہ کمرہ نگہداری کے لیے استعمال ہو تا تھا۔ اسے یہ کمرہ مناسب حرارت کو مدِ نظر رکھتے ہوئے پیش کیا گیا تھا۔ (یہ مارچ کا وسط تھا)۔ موسمِ گرما میں یہ تندور میں تبدیل ہو جاتا۔

تنہائی اس کے لیے بہتر تھی۔ وہ اپنے آپ کو خود سنبھالنا چاہتا تھا، اور کراؤس کی بیک وقت تمام دن کے لیے غیر موجودگی اس کے لیے باعثِ تسکین تھی۔ وہ اپنے وفادار دوست کی موجودگی میں تنگ نہیں ہوتا تھا۔ کراؤس اس کا بہترین ساتھی تھا مگر وہ چاہتا تھا کہ اس کا دوست تمام رات اس کے ساتھ جاگنے کے بعد مینڈوزا کے مناظر سے لطف اندوز ہوتا رہے۔ اسے کسی پر بوجھ بننے کے خیال سے ہی نفرت ہوتی۔ اس گھونسلے کی تنہائی کے دوران اس نے کوشش کی کہ جتنا ممکن ہو اپنی عزتِ نفس کو بحال کرے۔

یہ دروں بینی اورخود شناسی کے دن تھے۔ اسے اپنے لیے قابلِ عمل پیش رفت ترتیب دینے کے لیے تمام واقعے کا ازسرِنو جائزہ لینا پڑا۔ اس نے اپنی داخلی مکالمے کو خطوط میں تحریر کیا جس میں اس کا بہت وقت صرف ہوا۔ اس نے اپنے مختصر، مربوط رسم الخط میں، صفحات کے دفتر بھر دیے۔ تمام عمر اسے نامہ نگاری میں فراوانی حاصل رہی: واضح، مربوط، منظم، بامعنی۔ کچھ بھی اس سے بچ نہ پاتا۔

اس کے خطوط محفوظ کر لیے گئے اس لیے اس کے سوانح نگاروں کے لیے مواد کی کوئی کمی نہیں۔ اگرچہ ان میں سے کسی نے کوشش نہیں کی مگرا س کے سارے سفر کا روزنامہ، تقریباً ہر گھنٹے، اس کے ہر جذبے ، ہر ردِّعمل، ہر قدم اور ہر حرکت کو ضبط ِتحریر میں لانا مکمل طور پر ممکن تھا۔ اس کے خطوط کا یہ گنجینہ اس کی زندگی کے ہر راز سے پردہ اٹھا دیتا ہے۔ اس کے باوجود اس کی زندگی بہت پراسرار تھی۔

مینڈوزا کے قیام کے ابتدائی ایام کے دوران اس ہیجانی کارروائی کی دو وجوہ تھیں۔ وہ اپنی نامہ نگاری میں بہت پیچھے رہ رہا تھا۔ کیونکہ اس نے سینٹ لوئی سے اپنے کانپتے ہاتھوں کے ساتھ صرف کچھ مختصر تحریریں اور چند ایک خستہ تاثرات ارسال کیے تھے جن میں اطلاعات کا کال تھا اور اس نے وعدہ کیا تھا کہ وہ بعد میں تفصیل سے لکھے گا۔ اور اب اس وعدے کوپورا کرنے کا وقت آ گیا تھا۔ مگر اسے خود بھی کچھ چیزوں کی وضاحت چاہیے تھی۔ اوراسے اس پریشان کن صورت حال سے مفاہمت کرنی تھی۔ اور ایسا کرنے کے لیے اس کے پاس واحد ذریعہ اس کے خط لکھنے کی معمول کی مشق تھی۔

یہی وجہ ہے کہ اس کی زندگی کے اس باب کے متعلق بہت سی بالواسطہ یا بلا واسطہ معلومات دستیاب ہیں۔ جن کاتعلق نہ صرف براہِ راست واقعات کے ساتھ  بلکہ ان سے پیدا ہونے والے گہرے خدشات سے بھی ہے۔ فنکار کی یہ دستاویزی صلاحیت باقی ساری زندگی فطرتِ ثانیہ بن کر اس کے ساتھ رہی۔

اس کی پہلی اور مرکزی مکتوب الیہ آبائی علاقے آگس برگ میں مقیم اس کی بہن لوئزے تھی۔ وہ اس کے ساتھ بہت مخلص تھا۔ وہ اس سے کچھ نہیں چھپاتا اور نہ ایسا کرنے کی کوئی وجہ تھی۔ تاہم اسے ایسا لگا کہ لوئزے اس تمام ممکنہ دستاویز کو وصول کرنے کے قابل نہیں ہو گی۔ یا کسی حد تک؛ وہ ایسا کر بھی سکتی تھی (کیوں کہ ان کے درمیان کوئی راز نہیں تھا)۔ مگر اسے کچھ حصے تلف کرنے پڑتے۔ یہ ایسی صورت حال تھی جن میں تکمیل کے بعد بھی خلا کا احساس رہ جاتا ہے۔

ایسا شاید اس لیے بھی تھا کہ اس’تکمیل‘ کے اندر دیگر’تکمیلیں‘ بھی شامل تھیں جو مکتوب نگار کی ذاتی دنیا میں سیاروں کی طر ح گھوم رہی تھیں۔ اور اس گردش کے زیرِ اثر کچھ سیاروں کی مخصوص اطراف کو اخفا میں رہنا تھا۔ اگر اس با ت کو جدید اصطلاح میں بتانے کی کوشش کی جائے جو کہ خطوط میں نہیں ملتی، تو اسے ہم ’بے شکل ہیئت‘ کا مسئلہ کہہ سکتے ہیں۔

رگینڈاس نے آغاز سے ہی دنیا بھر میں بکھرے ہوئے مکتوب الیہ اکٹھے کر لیے تھے۔ اب اس نے دیگر پتوں پر خط لکھنے کا سلسلہ آغازکیا۔ اس کے اس تفصیلی مکالمے میں ہیئتی اور فطری مصور، باڑہ مالکان، کسان، صحافی، گھریلو عورتیں، متمول افراد، تارک الدنیا، حتّٰی کہ قومی ہیروز بھی شامل تھے۔ہر خط ایک مختلف لہجے کا حامل ہوتا، مگر یہ سب لہجے اس کے اپنے تھے۔ ہر تغیر ایک عجیب غیر امکانی صورت کے گرد گردش کرتا۔ وہ کسی کو یہ بتا سکتا تھا کہ ’میں ایک عفریت ہوں‘؟ کاغذ پر اس بات کو اتارنا قدرے آسان تھا۔ مگر اس بات کی اہمیت اور شدت کا ابلاغ بہر حال بہت مشکل تھا۔ اوراس کے چلی میں رہنے والے دوستوں میں یہ مسئلہ بہت اشد نوعیت کا تھا۔

ان کو لکھے جانے والے خطوط میں وہ خاص احتیاط سے کام لیتا۔ خاص کر گوٹیک کو لکھے جانے والے خطوط میں جو پہلے ہی اسے خط لکھ کر سنتیاگو میں اپنے گھر مدعو کر چکا تھا۔ جیسا کہ وہ کچھ ماہ پہلے سفر پر روانہ ہونے سے پہلے بھی کہہ چکا تھا۔ اب کیونکہ اس عرصے میں اس کی اس سے ملاقات ہونے جا رہی تھی تو یہ ضروری تھا کہ وہ اسے آگاہ کر دے۔ اس کے معاملے میں یہ واضح تھا کہ اسے مبالغے سے کام لینا ہو گا تا کہ اسے کوئی حیرت نہ ہو۔ مگر اس کے چہرے کی موجودہ صورتِ حال کے پیشِ نظر مبالغہ آسان نہیں تھا۔ اسے کسر بیانی کا مسئلہ درپیش تھا۔ خاص طور پر اگر وہ اس کی تحریروں کو روایتی مبالغے کے تناظر میں دیکھتے تو ان کی حیرت فزوں ہونے کا خدشہ تھا۔

بہرحال اس نے خود کو مقید نہیں کر لیا۔ اس کے جسم کی قدرتی طور پر بحالی کے لیے تازہ ہوا کی کثیر مقدار اور ورزش لازمی تھی۔ اور اس نیم مفلوج حالت میں بھی، متواتر دردِ شقیقہ، اعصابی حملوں، اور مستقل ادویات کے باوجود اس پر یہ لازم ہو گیا کہ وہ فراواں دھوپ کے اوقات میں کچھ گھنٹے گھڑ سواری اور قدرتی دنیاکی تصویر کشی پر صرف کرے۔ باوفا کراؤس نے اس کا ساتھ نہیں چھوڑا تھا۔ اس پر درد کا حملہ گھر سے کہیں دور بھی ہو سکتا تھا۔ ایسی صورت میں وہ رگینڈاس کو، اس کی چیخوں سے بے نیاز، اپنے گھوڑے کی پشت پر اٹھائے واپس لے آتا۔ یہ عظیم مسائل، تاہم، ان کی تفریحات کا شاندار حصہ نہیں تھے۔

رگینڈاس اپنے نشست و برخاست میں کمال درجہ سکون اور سلیقے کے باوجود بہت سارے لوگوں کی توجہ کا مرکز بنا ہوا تھا۔ لوگ اسے دیکھنے کے لیے اکٹھے ہو جاتے۔ مینڈوزا کے اس نیم مہذب ، خوش نظارہ علاقے میں ادب کے قاعدے کی خال ہی توقع کی جا سکتی تھی۔ بچے ہی کچھ کم نہ تھے مگر بڑے تو بچوں سے بھی زیادہ بچگانہ تیور دکھا رہے تھے۔ وہ بڑے انہماک سے اسے آبپاشی میں استعمال کیے جانے والے بڑے بڑے آبی آلات کی ڈرائنگ بناتے دیکھتے(یہ اس کا نیا جنون تھا)، اور وہ اس کے کاغذات کو دیکھنے کی خواہش کی شدت میں گھلے جا رہے تھے۔ وہ کیا تصور کرتے تھے؟ جہاں تک رگینڈاس کا تعلق ہے وہ جب بھی اپنی پنسل اٹھاتا اسے تصویر کرنے کی اپنی ترغیب کچلنا پڑتی۔

موسمِ گرما کے اختتام پر موسم درجۂ کمال کو پہنچ چکا تھا۔ منظر ناموں میں لامتناہی تبدیلیاں رونما ہونا شروع ہو گئیں۔ کارڈی لیرا کی بدلتی ہوئی روشنیاں انھیں ساعت بہ ساعت ڈھانپ لیتیں؛انھیں شفاف بناتیں؛ انھیں لامتناہی جزئیات کی سدا بہتی ہوئی آبشار میں تبدیل کر دیتیں۔ اینڈیز کی سنگین فصیلوں سے چھنتی ہوئی دوپہر کی دھوپ اپنی ہی صبح کا ہیولیٰ نظر آتی۔ وسط دوپہر کی بے وقت گلابیوں کا مسکن معلوم ہوتی۔

 دس سے بارہ گھنٹے تک جھٹپٹے کا سماں رہتا۔اور دوستوں کے ساتھ شب خرامی کے دوران بادِ بے سمت کے جھونکے ستار وں اور پہاڑوں کی ترتیب بد ل جاتے۔اگر یہ سچ تھا، جیسا کہ بدھ کہتے ہیں، کہ ہر چیز، حتّٰی کہ ایک پتھر بھی، برگِ خشک یا ایک پتنگا، پہلے بھی کہیں موجود تھا اور دوبارہ بھی ہو گا۔ سب کچھ جنموں کے چکر کا حصہ ہے۔ پھر یہ کہ سب کچھ ایک ذات تھا، وقت کے پیمانے پر ایک اکیلا آدمی۔ کوئی بھی آدمی، بدھ یا کوئی بھکاری، کوئی خدا یا کوئی غلام۔ اگر کوئی مناسب وقت دیا جائے تو شاید کائنات کے ساتوں اجزا مل کر ایک آدمی بنا دیں۔ اس کے ضابطے پر اس کے اہم اثرات تھے: جیسا کہ یہ ماورائی میکانیکی نظام کی طرح خود کار نہیں ہو سکتا تھا۔

ہر پرزہ پہلے سے متعین شدہ جگہ میں جڑا ہوا؛ ہر پرزہ دوسرے کی جگہ لے سکتا تھا۔ اور اس کے ذریعے رونما ہونے والی تبدیلیاں زمانی نہیں بلکہ معنوی جہات کی حامل ہوتیں۔ ا س خیال سے حقیقت کا ایک بالکل مختلف تصور نظر آتا ہے۔ اپنے کام میں رگینڈاس اس نتیجے پر پہنچ چکا تھا کہ ایک ڈرائنگ میں موجودخطوط حقیقت میں نظر آنے والے خطوط کے من و عن نمائندہ نہیں ہونے چاہئیں۔ خط کا مقصد، اس کے برعکس، تعمیری تھا۔ یہی وجہ تھی اس کی ڈرائنگ کی مشق اس کی سوچ کے مقابل ناقابلِ تخفیف رہی۔ اور اس کے باوجود کہ وہ اپنے ضابطے پر مکمل دسترس رکھتا تھا، وہ بدستور خاکے بناتا گیا۔

گوڈوئے خاندان کے افرادابھی تک اس کے نئے چہرے کے عادی نہیں ہوئے تھے۔ یہ مستقبل قریب میں رونما ہونے والے واقعات کے تناظر میں ایک دلچسپ اشارہ تھا۔ لوگ عموماً خطرناک ترین بد ہیئتی کے بھی عادی ہو جاتے ہیں، مگر اس کے ساتھ چہرے کی غیر ارادی حرکات، سیال مادہ، بے حس تاثرات بھی شامل ہوں تو عادت کے قائم ہونے کے لیے کوئی قرار واقعی بنیاد فراہم نہیں ہوتی۔ ایسے میں انسانی ادراک بھی سیال مادے کی طرح ہو جاتا ہے۔ فطرتاً ملنسار اور باتونی ہونے کے باوجود رگینڈاس شام کے کھانے کے فوراً بعد تخلیہ کر لیتا اور اپنی شامیں تنہا گزارتا۔ اس کے ایسا کرنے میں کوئی عجیب بات نہیں تھی کیونکہ اس کے پاس معقول جواز تھا۔

وہ انسانی قوت برداشت سے ماورا دردِ شقیقہ کا شکا ر تھا۔ ابتدا میں اس کے پاس اپنے اٹاری نما کمرے میں لیٹے کراہتے رہنے کے علاوہ اور کوئی کام کرنے کی صلاحیت نہیں تھی— اور یہ کام وہ صرف بستر میں نہیں کرتا تھا بلکہ فرش پر، دیواروں کے ساتھ اور چھت کے ساتھ بھی کرتا تھا—جب دوا کا اثر ہوتا تو وہ خطوط نویسی کی طرف پلٹ آتا۔

اپنی تحریروں میں وہ حتّٰی الامکان سچ لکھنے کی کوشش کرتا۔ اس کے لیے اس کی وجوہات کچھ یوں تھیں: سچ اور جھوٹ دونوں کو بتانے کے لیے، اصولی طور پر، ایک ہی جتنی کوشش درکار ہوتی ہے، تو کیوں نہ سچ بتایا جائے؛ بغیرکسی ابہام کے، بغیر کسی اسقاط کے؟ چلیں صرف تجرباتی طور پہ ہی ایسا کر کے دیکھتے ہیں۔ مگر ایسا کہنا ایسا کرنے سے بہت آسان تھا۔ خاص طوپر، اس کے معاملے میں جہاں کرنا بھی کہنے کی ہی کی ایک شکل تھا۔

شاید مارفین کبھی بھی اس کے جسمانی نظام کا حصہ نہیں بنی تھی۔ شاید وہ ووسرے یا تیسرے مرحلے میں داخل ہورہا تھا۔ کہیں ایسا تو نہیں کہ افیونی دوا، دردِ شقیقہ اور فطرت کے ہیئتی مصور کے اعصابی نظام کی شکست و ریخت کسی یکسر نئے نتیجے کا موجب ہو رہی تھی؟ بہر حال سچ کا تصور اس کے تخیل میں دیوقامت بنتا جا رہا تھا اور چھت پر واقع چھوٹے سے کمرے میں اس کی راتیں صرف کر رہا تھا۔

اس دور کے اس کے خطوط بظاہر تو زیادہ تر ایک خارجی معاملے سے متعلق تھے جس کی طرف رگینڈاس کسی جنونی کی طرح بار بار پلٹتا تھا۔ یورپ میں اس کی شہرت کی بنیاد بننے والی کتاب’برازیل کی تصویری سیاحت‘ دراصل کسی اور نے لکھی تھی۔ اسے فرانسیسی صحافی اور فن کے نقاد وکٹرایم اے ہوبر (۱۸۶۹۔۱۸۰۰) نے رگینڈاس کی قلمی یادداشتوں سے ترتیب دیا تھا۔ گو اس وقت اسے یہ عجیب نہیں لگا تھا۔ مگر اب ایسا لگ رہا تھا، اور وہ حیران تھا کہ وہ اس منصوبے پر کیوں رضامند ہوا۔ یقیناً یہ دھوکہ دہی تھی کہ جب ایک کتاب زیدنے لکھی ہے تو اسےبکر کے نام سے شائع کیا جائے۔