فوتاکی نے دروازے کے پٹ سے ٹیک لگائی اورسوچنے لگا کہ اب بغیر دیکھے کیسے نکلے۔ مگر یہ تقریباً ناممکن تھا کیونکہ باہر جانے کا راستہ باورچی خانے سے گزرتا تھا، اوروہ کھڑکی پھلانگنے کے لیے بہت بوڑھا تھا— ویسے بھی مسز کرانر یا مسز ہالچ فوراً دیکھ لیتیں، جو ہمیشہ تاک جھانک میں رہتیں۔ اور اس کاعصا… اگرشمِڈ نے دیکھ لیاتو فوراً سمجھ جائے گا کہ وہ یہاں چھپا ہے، اور شاید پھر اس کاحصہ دینے سے بھی انکارکر دے۔ فوتاکی جانتا تھا وہ ایسے معاملات میں مذاق نہیں کرتا۔ یوں اسے بالآخر اسی طرح بھاگنا پڑے گا جیسے سات برس پہلے آیا تھا— دوسرے خوش حالی کے مہینے کے دوران اعلان کے کچھ ہی عرصے بعد، اپنے پرانے پھٹے پاجامے اوربوسیدہ کوٹ میں، خالی جیبوں اور خالی پیٹ کے ساتھ۔

مسزشمِڈراہداری میں بھاگی،جبکہ فوتاکی نے دروازے سے کان لگایا۔

’’شوربندکرو،میری بلی!‘‘شمِڈکی کھردری آواز آئی۔ ’’ویسا ہی کرو جیسا کہتا ہوں، سمجھیں؟‘‘

فوتاکی کے چہرے پرگرمی دوڑگئی۔ ’’میرے پیسے…‘‘ وہ خودکو پھنسے ہوئے محسوس کررہا تھا۔ وقت کم تھا، اس نے طے کر لیا کہ اب کھڑکی ہی سے نکلے گا— ’’کچھ نہ کچھ ابھی کرنا ہوگا۔‘‘ وہ ابھی کھڑکی کی کنڈی گھمانے ہی والاتھا کہ شمِڈ کے قدموں کی چاپ سنائی دی۔ ’’یہ پیشاب کرنے جا رہا ہے!‘‘ وہ دبے پاؤں واپس دروازے پرآیا اورسانس روکے کان لگایا۔

جب پچھلے صحن کادروازہ شمِڈکے پیچھے بندہوا، وہ احتیاط سے باورچی خانے میں نکلا؛جھنجھلائی ہوئی مسز شمِڈ کو دیکھا جو ہاتھ نچا رہی تھی۔ اورایک لفظ کہے بغیر دروازے کی طرف لپکا۔باہر نکل کر جیسے ہی یقین ہواکہ دوسرا واپس آچکا ہے، اس نے زور سے دروازہ پیٹا —

’’ارے،کوئی ہے گھرمیں؟ شمِڈ،میرے دوست!‘‘

وہ گرجدارآوازمیں چیخا،اور دوسرے کو بھاگنے کا موقع نہ دیتے ہوئے فوراًاندر داخل ہوگیا۔

جب شمِڈباورچی خانے سے نکل کر پچھلے دروازے کی طرف بھاگنے لگا تو فوتاکی اس کے سامنے آن کھڑا ہوا۔

’’ہا!دیکھوذرا!‘‘ وہ طنزیہ انداز میں بولا۔ ’’کہاں جا رہے ہو اتنی جلدی، میرے دوست؟‘‘

شمِڈگونگا رہ گیا۔

’’میں بتاتاہوں کہاں! میں تمہاری مددکرتا ہوں، ڈرو مت!‘‘ فوتاکی کا چہرہ سخت ہو گیا۔ ’’پیسوں سمیت فرار ہونا چاہتے تھے، ہے نا؟ ٹھیک پہچانا؟‘‘

شمِڈپلکیں جھپکاتارہا۔فوتاکی نے سر ہلایا۔

’’کمال ہے،ساتھی۔میں نے تمھیں ایسا نہیں سمجھاتھا۔‘‘

وہ واپس باورچی خانے میں آئے اورمیز کے پاس آمنے سامنے بیٹھ گئے۔

مسزشمِڈگھبراہٹ میں لکڑی کے چولہے کے اردگرد مصروف ہونے کا ڈھونگ رچانے لگی۔

’’سنو،دوست…‘‘شمِڈہکلاتے ہوئے بولا۔ ’’میں فوراً سب بتاتا ہوں…‘‘

فوتاکی نے ہاتھ سے اشارہ کیا:

’’میں سب سمجھ گیاہوں!بس یہ بتاؤ کہ کرانر بھی شامل تھا یا نہیں؟‘‘

اب پھنسے ہوئے شمِڈنے سر ہلایا:

’’آدھا آدھا۔‘‘

’’حرامزادے!‘‘ فوتاکی بھڑک اٹھا۔ ’’تم دونوں مجھے الو بنا رہے تھے!‘‘ پھر سر جھکا کر سوچ میں پڑ گیا۔

’’اب کیا؟اب کیاکریں؟‘‘ اس نے آخرپوچھا۔

شمِڈنے جبڑے بھینچ کرکندھے جھٹکے۔

’’کیاکرسکتے ہیں؟تم بھی اسی کشتی میں ہو، میرے دوست۔‘‘

’’کیا مطلب؟‘‘فوتاکی نے دل ہی دل میں حساب لگاتے ہوئے پوچھا۔

’’تین حصے کریں گے۔‘‘شمِڈنے آہستگی سے کہا۔

’’بس شرط یہ کہ اس بات کاذکر تم کسی سے نہ کرو۔‘‘

’’فکرنہ کرو۔‘‘ مسزشمِڈنے لکڑی کے چولھے کے پاس آہ بھری۔

’’تم لوگوں کادماغ چل گیا ہے۔واقعی سمجھتے ہو کہ بچ نکلو گے؟‘‘

شمِڈنے جیسے اس کی بات سنی ہی نہ ہو،غور سے فوتاکی کو دیکھا۔

’’ہاں،اب تم یہ تونہیں کہہ سکتے کہ معاملہ صاف نہیں کیا۔ مگر میں تم سے ایک بات مانگنا چاہتا ہوں۔ دوست، مجھے برباد مت کرنا!‘‘

’’ہم پہلے ہی طے کر چکے ہیں،نہیں؟!‘‘

’’ہاں،اس پربحث ہی نہیں!‘‘ شمِڈ بولتا گیا، اور اس کی آواز التجا میں بدلتی گئی۔