’’ہم کس کے لیے لکھتے ہیں؟‘‘

ناصر عباس نیّر کی تحریروں/انٹرویو وغیرہ کے تراجم کی تمام پوسٹوں کے لیے یہاں کلک کریں۔

ناصر عباس نیّر

’’ہم کس کے لیے لکھتے ہیں؟‘‘

آپ کا اچھا مصنف ہونا، آپ کے سچے اور دیانت دار ادیب ہونے کی ضمانت نہیں۔ —ناصر عباس نیّر

ترک نوبیل انعام یافتہ اورخان پاموک، اپنے ناول ’’سرخ میر انام‘‘ میں ایک جگہ لکھتے ہیں کہ وہ مصور جو اپنے ناظرین ین کے ممکنہ ردِّعمل کو سامنے رکھتا ہےاور ان کی پسند ناپسند کا خیال رکھتا ہے، اپنے خلاف جرم کا ارتکاب کرتا ہے، نیز ایک معاہدےکی شرائط توڑتا ہے(یہ وضاحت میری ہے)۔ کیوں کہ وہ فن کے لیے نہیں، کسی اور شے کے لیے کام کرتا ہے اور یہ اس کی اپنی حقیقی ذات نہیں ہے جس کی پسند ناپسند کا وہ خیال رکھ رہا ہو۔ آدمی کی حقیقی ذات اور ’’دوسروں‘‘ کی مسلط کردہ ذات میں فرق کی لکیر کا علم ہر مصنف کو ہونا چاہیے۔

جب آپ کسی صنف میں لکھنا شروع کرتے ہیں تو گویا، اس صنف سے ایک خاموش معاہدہ کرتے ہیں کہ آ پ اس کی شعریات، اخلاقیات، جمالیات، رسمیات وغیرہ میں ایجا دپسندی کا مظاہرہ تو ضرور کریں گے ،مگر انھیں پامال نہیں کریں گے؛ اس کی پہلے سے قائم شناخت میں کچھ اضافہ کریں گے، اور اس کے لیے اس کی روایت ورسمیات کو ضرورت پڑنے پر چیلنج بھی کریں گے، ان سے انحراف بھی کریں گے مگر اس کی شناخت کو مسخ نہیں کریں گے۔

جب وہ آپ کے قلم یا موقلم سے نکل کر دنیا میں پہنچے گی تو وہ اپنے زخمی، مسخ، مضمحل، لولے لنگڑے وجود کے ساتھ نہیں، کہیں بہتر، تروتازہ و توانا صورت میں پہنچے گی اور آپ کوتاریخ کے نادیدہ انسانوں کے ایک عظیم سلسلے سے منسلک کرے گی ۔ یعنی آپ معاہدہ نہیں توڑیں گے۔

ناول میں تتلی نام کا ایک منی ایچر مصور، چاول کے دانوں اور ہاتھوں کے ناخنوں پر چھوٹی چھوٹی، ناقابل فہم تصویریں بنانے میں طاق ہے، اور اس کا مدِّمقابل تلاش کرنا مشکل ہے مگر استاد عثما ن کےبہ قول اس کی غلطی یہ ہے کہ وہ اپنی غیر معمولی فنی صلاحیت کے باوجود ،وہ فن کی محبت میں نہیں بلکہ اس خوشی کا تصور کرکے مصوری کرتا ہے، جودوسرے اس کی تصویریں دیکھ کر محسوس کیا کرتے۔ وہ بلاشبہ ’’اچھا‘‘ مصور ہے، اسے فن پر قدرت حاصل ہے،اپنے فن کے ذریعے دوسروں کو متاثر کرنے کی غیر معمولی صلاحیت بھی ہے، مگر وہ خود سے اور فن سے ’’دیانت دار‘‘ نہیں ہے۔

آپ کا اچھا مصنف ہونا، آپ کے سچے اور دیانت دار ادیب ہونے کی ضمانت نہیں۔

اگر آپ دوسروں کے ممکنہ ردِّعمل کو سامنے رکھ کر لکھتے ہیں، ان کی خوشی یا ناراضی کو سامنے رکھ کر لکھتے ہیں، کسی بیرونی ترغیب،لالچ،خوف کا شکار ہوکر لکھتے ہیں تو آپ کو اس سچائی کا سامنا کرنا چاہیے کہ آپ غرض مند ہیں، بزدل ہیں، مفاد پسند ہیں اور ایسے میں آپ نہ تو خود اپنی حقیقی روح کا اظہار کرسکتے ہیں، نہ آپ کے قلم سے فن اپنی اصل کے ساتھ خود کو ظاہر کرسکتا ہے۔

فن آدمی کے وجود کی گہرائی سے ، جہاں ایک بے عیب، ہر طرح کے غیر کے احساس سے آزادخاموشی وجود رکھتی ہے، پھوٹتا ہے۔ ایک حقیقی مصنف اس لیے لکھتا ہے کہ ان آوازوں کو سنا جاسکے جو پہلی بار آپ کے توسط سے اپنا اظہار کرنا چاہتی ہیں۔ ضروری نہیں کہ یہ آوازیں صرف آپ کی اپنی ذات سے متعلق ہوں، یہ آپ کے ارد گرد کی حقیقی دنیا، حقیقی انسانوں، تاریخ، تہذیب سے متعلق بھی ہوسکتی ہیں۔ آدمی اپنے وجود کی آخری حدوں میں بھی اپنے ہم جنسوں اور اس کائنات کی دیگر مخلوقات سے ایک گہرے تعلق کو محسوس کرسکتا ہے اور انھیں ’’غیر‘‘ سے الگ کرسکتا ہے، اگر وہ خود کو ’’دوسروں‘‘ کے خوف، لالچ، اورمقبولیت اور اعزازات کی منھ زور خواہش سے آزاد محسوس کرسکے۔

:::

براہِ کرم فیس بک (Face Book)، انسٹاگرام (Instagram)، اور ٹویٹر (Twitter) کے سوشل میڈیا نیٹ ورکس پر— اوپر دیے گئے متعلقہ نشان (آئیکن) پر کلک کر کے — ہمارے نقشِ پا دیکھیے اور Follow کیجیے تاکہ آپ جانچ سکیں کہ ہم کس طرح اردو زبان کی ترقی و ترویج کی خاطر تراجم کے واسطے سے اس کے فروغ اور آپ کی زبان میں ہونے والے عالمی ادب کے شہ پاروں کے تراجم کی رسائی دنیا بھر میں کرنے کی سعی کر رہے ہیں ۔ ہم آپ سے ملتمس ہیں کہ آپ بھی اپنے طور پر انھیں دنیا کے ساتھ بانٹ کر (شیئر کر کے) ہماری ان کاوشوں میں اپنا حصہ ڈالیں ۔ نیز آپ کے ساتھ ساتھ معزز قارئین سے یہ بھی ملتمس ہیں کہ سائٹ پر شائع ہونے والے ہر ترجمے کے آخر میں دیے گئے تبصرے کے خانے (کمینٹس سیکشن) میں اپنی آراء کا کھل کر اظہار کر کے مترجمین کی حوصلہ افزائی و پذیرائی بھی کریں کیوں کہ وہ تلاشِ بسیار سے آپ کے لیے خوب سے خوب تر کا انتخاب کرتے ہیں اور پھر انتہائی محنت، لگن اور دل جمعی سے دنیا بھر کا بہترین ادب، آپ کو آپ کی اپنی زبان میں پڑھنے کے لیے، عمدہ تراجم کے وسیلے سے فراہم کرتے ہیں۔ ہم آپ کی آراء کو خوش آمدید کہتے ہوئے آپ کے ممنون ہوں گے۔