میں اسلامی فتوحات کابھی ذکرنہیں کروں گا،جنھوں نے ہزاروں میناروں کوبسا دیا— جو عبادت، نیکی اورخدا سے وابستگی کی دعوت دیتے ہیں— یہ فتوحات ہندوستان اورچین کے کناروں سے لے کر فرانس کی سرحدوں تک پھیل گئیں۔ اورنہ ہی میں ان مختلف مذاہب اورنسلوں کے درمیان پیدا ہونے والی اخوت اورہم آہنگی کا ذکر کروں گا،جو اس تہذیب کے دامن میں پروان چڑھی— ایسا رواداری کا ماحول، جونہ اس سے پہلے کبھی انسانیت نے دیکھا، نہ اس کے بعد۔

میں،اس کے برعکس،اس تہذیب کاتعارف ایک جذباتی اورڈرامائی صورتِ حال کے ذریعے کراؤں گا، جواس کی نمایاں ترین خصوصیات میں سے ایک کانچوڑ ہے۔ رومی سلطنت (بازنطین) کے خلاف ایک فتح مند جنگ کے بعد، اسلامی تہذیب نے  جنگی قیدیوں کواس شرط پر واپس کیاکہ بدلے میں اُسے قدیم یونانی ورثے کی چند کتابیں دی جائیں جن کا تعلق فلسفہ، طب، اورریاضی جیسے علوم سے تھا۔ یہ واقعہ انسانی روح کے اُس جوہرکی گواہی ہے جوعلم حاصل کرنے کا متلاشی ہوتا ہے، چاہے وہ متلاشی خود توحید پر ایمان رکھتاہو اورجس سے علم لیا جا رہا ہو، وہ ایک مشرکانہ تہذیب کا ثمر ہو۔

یہ میری تقدیرتھی،خواتین وحضرات،کہ میں ان دونوں تہذیبوں کی آغوش میں پیدا ہوا— میں نے انہی کادودھ پیا، انہی کے ادب اورفن سے غذاحاصل کی۔ پھر میں نے آپ کی شاندار اورمسحور کن تہذیب کاعرق بھی چکھا۔ ان سب اثرات سے، اورساتھ ہی اپنی ذاتی فکری بے چینیوں سے، میرے اندرسے الفاظ پھوٹے، ایسے الفاظ جوشبنم کی مانند تھے۔ یہ وہی الفاظ ہیں جنھیں آپ کی محترم اکیڈمی کی قدر شناسی نصیب ہوئی، جس نے میری اس کوشش کو نوبیل انعام جیسے عظیم اعزاز سے نوازا۔ پس اس اکیڈمی کاشکریہ، میری طرف سے بھی اوران عظیم گزرے ہوئے معماروں کی طرف سے بھی جنھوں نے ان دونوں تہذیبوں کی بنیاد رکھی تھی۔

خواتین و حضرات! 

آپ یہ سوچ رہے ہوں گے: یہ شخص، جو تیسری دنیا سے آیا ہے، آخر اسے کہانیاں لکھنے کا سکونِ قلب کہاں سے ملا؟ آپ کا سوچنا بالکل بجا ہے۔ میں ایک ایسی دنیا سے آیا ہوں جو قرضوں کے بوجھ تلے دبی ہوئی ہے، اور ان قرضوں کی ادائیگی اسے قحط کے دہانے تک لے آئی ہے— یا کم از کم بہت قریب۔ اس دنیا کے کچھ لوگ ایشیا میں سیلابوں کا شکار ہو کر مر جاتے ہیں، اور کچھ افریقہ میں بھوک سے دم توڑ دیتے ہیں۔ جنوبی افریقہ میں، لاکھوں انسان اس دور میں— جو انسانی حقوق کا زمانہ کہلاتا ہے— رد کیے جانے اور تمام انسانی حقوق سے محرومی کا شکار ہیں، گویا وہ انسانوں کی گنتی میں ہی نہیں آتے۔

مغربی کنارے اورغزہ میں کچھ لوگ اپنی ہی زمین پر،جوان کے باپ، دادااورپردادا کی زمین ہے، اجنبیوں کی طرح زندگی گزاررہے ہیں— جیسے وہ گم ہو چکے ہوں۔ انھوں نے وہ پہلاحق مانگا جوقدیم انسان نے بھی تسلیم کیا تھا: کہ دوسرے انھیں اس سرزمین کے مالک کے طورپر تسلیم کریں۔ مگر ان کے اس بہادر اورباوقار مطالبے کا جواب انھیں یہ ملاکہ ان کی ہڈیاں توڑی گئیں، ان پر گولیاں چلائی گئیں، ان کے گھر مسمار کیے گئے، اورانھیں جیلوں اورکیمپوں میں اذیت دی گئی— مرد، عورتیں، نوجوان، بچے سب کے ساتھ یہی سلوک ہوا۔ ان کے اردگرد ۱۵کروڑ عرب بستے ہیں، جویہ سب کچھ غصے اورکرب کے ساتھ دیکھ رہے ہیں۔اگراس مسئلے کو اُن لوگوں کی دانائی نے نہ سنبھالا جومنصفانہ اورہمہ گیر امن کے خواہاں ہیں تویہ پوراخطہ ایک ہولناک تباہی سے دوچار ہوسکتا ہے۔

ہاں،سوال بجاہے—آخرتیسری دنیاسے تعلق رکھنے والے انسان کو کہانیاں لکھنے کا سکونِ قلب کیسے میسر آیا؟ خوش قسمتی سے فن— ایک فیاض اورہمدرد شے ہے۔ جس طرح وہ خوش نصیبوں کے ساتھ رہتا ہے، وہ بدحالوں کوبھی نہیں چھوڑتا۔ یہ دونوں کو،یکساں طورپر، اپنے سینے میں ابھرتے جذبات کے اظہار کے لیے ایک مناسب وسیلہ عطاکرتا ہے۔

تمدن کی تاریخ کے اس فیصلہ کن لمحے میں یہ ناقابلِ قبول اورناقابلِ تصورہے کہ انسانیت کی آہوں کو خلامیں گم ہونے دیا جائے۔ اس میں شک نہیں کہ انسانیت اب بلوغت کی منزل کوپہنچ چکی ہے، اورہمارا دوردوعالمی طاقتوں کے درمیان باہمی ہم آہنگی کی اُمیدیں لے کرآیا ہے۔ انسانی ذہن اب یہ ذمہ داری اٹھاچکا ہے کہ وہ تباہی اورنیستی کے تمام اسباب کوختم کرے۔ اورجس طرح سائنسدان صنعتی آلودگی سے ماحول کو پاک کرنے میں جُتے ہوئے ہیں، اسی طرح دانشوروں کوچاہیے کہ وہ انسانی معاشرے کو اخلاقی آلودگی سے پاک کرنے کی کوشش کریں۔ یہ ہماراحق بھی ہے اورفرض بھی— کہ ہم مہذب اقوام کے بڑے قائدین اور ان کے ماہرینِ معیشت سے مطالبہ کریں کہ وہ ایسا حقیقی انقلابی قدم اٹھائیں جوانہیں عصرِ حاضر کی روح سے ہم آہنگ کردے، اورانھیں وقت کی قیادت کے قابل بنا دے۔

قدیم زمانوں میں ہرحکمران صرف اپنی قوم کی بھلائی کے لیے کام کرتا تھا۔ باقی تمام اقوام یا تو دشمن سمجھی جاتی تھیں یا استحصال کانشانہ۔ کسی قدریا اصول کی کوئی پروا نہ تھی، سوائے برتری اورذاتی عظمت کے۔ اسی مقصد کی خاطر بہت سے اخلاق، اعلیٰ نظریات اورانسانی اقدار کو پامال کر دیا گیا۔ بے شمار غیر اخلاقی طریقوں کوجائز قرار دیا گیا۔ ان گنت جانوں کوہلاک کردیا گیا۔ جھوٹ، دھوکہ، غداری اور ظلم— یہ سب عقل مندی کی علامت اور عظمت کاثبوت سمجھے جاتے تھے۔