فسوں کاریاں

انڈینزکونہ دیکھ سکنے کی مایوسی کا حوالہ دیتے ہوئے کراؤس نے اپنے دوست سے پوچھا کہ کہیں اس کو اس منظر پر بھی تاخیر سے پہنچنے پر افسوس تو نہیں۔ رگینڈاس نے تصور کیا۔ ایک ایسا ہرا بھرا میدان جسے اچانک ایک بھنبھناتا بادل ڈھانپ لے اور اسے کچھ لمحوں میں ملیا میٹ کر دے۔ کیا کوئی تصویر اس کا احاطہ کر سکتی تھی؟ نہیں۔ شاید ایک چلتی ہوئی تصویر۔ شایدایک متحرک تصویر ایسا کر سکے۔

انھوں نے وقت ضائع کیے بغیر اپنا سفر جاری رکھا۔ یہ اندازہ لگانا بے کار تھا کہ ٹڈی دل نے کس سمت کا رخ کیا کیوں کہ متاثر ہ علاقہ بہت بڑا تھا۔ انھیں جلد از جلد سینٹ لوئی پہنچنا تھا اور اس دوران اگر ممکن ہو سکے تو اپنے سفر سے لطف اندوز ہونا تھا۔ یہ سب ان کے تجربے کاحصہ تھا۔ فضا میں ہلکا سا ارتعاش کسی متوقع خطرے کی گونج معلوم ہو تا تھا۔

کچھ عملی مشکلات نے مصوروں کے لیے لطف اندو زی کو مشکل بنا دیا۔ اس دن دوپہر کے وقت گھوڑے دو دن کے جبری فاقے کے بعد اپنی برداشت کی آخری حدتک پہنچ چکے تھے۔ وہ قابو سے باہر ہوگئے اور انھیں روکنے کے سوا کوئی چارہ نہ رہا۔ بڑھتے ہوئے درجہ حرارت نے جو، شاید ۱۲۲ درجے تک پہنچ چکا تھا، صورتِ حال کو مشکل ترکر دیا۔ ہوا میں کوئی ذرہ بھی متحرک نہیں تھا۔ ہوا کا دباؤ بہت گر چکا تھا۔ ان کے سروں پر سرمئی بادلوں کی چھت منڈلا رہی تھی۔ مگر اس میں گرج چمک کے کوئی آثار نہیں تھے۔ وہ کیا کر سکتے تھے؟ نوجوان باورچی خوفزدہ تھا اور وہ گھوڑوں سے ایسے دور رہتا تھا جیسے وہ اسے کاٹ لیں گے۔ بوڑھا گائیڈ کے طور پر اپنی ناکامی کے احساس ِشرمندگی سے آنکھ نہیں اٹھا سکتا تھا۔

یہ اعصاب شکن صورتِ حال تھی۔ وہ پہلی مرتبہ ایسے علاقے سے گزر رہا تھا جس پر ٹڈی دل کا حملہ ہوا ہو۔ جرمن سرگوشیوں میں باتیں کرتے۔ و ہ پہاڑوں میں گھرے ہوئے چاندنی کے سمندر کے درمیان تھے۔ کراؤس اس حق میں تھا کہ کچھ بسکٹوں کو پانی اور دودھ میں ملا کے گھوڑوں کو کھلایا جائے اور کچھ گھنٹے انتظار کے بعد شام کی خنکی میں سفر آغاز کیا جائے۔ رگینڈاس کے لیے یہ منصوبہ اتنا احمقانہ تھا کہ اس پر بات بھی نہیں ہوسکتی تھی۔ اس نے ایسی تجویز دی جو قدرے معقول تھی۔ سرپٹ دوڑتے ہوئے پہاڑوں کی طرف پہنچا جائے اور دیکھا جائے کہ ان کے دوسری طرف کیا ہے۔ انھیں فاصلوں کو تصاویر میں دیکھنے کی عادت تھی اس لیے وہ چھوٹی چھوٹی پہاڑیوں تک کے فاصلے کا درست اندازہ نہ لگا سکے۔ دراصل وہ پہلے سے ان کے درمیان موجود تھے۔

اس کا مطلب یہ ہواکہ متحرک بھوکی مخلوق نے ان کی ڈھلانوں پر اُگا سبزہ بھی نہیں چھوڑا تھا۔ انھوں نے گائیڈ سے مشورہ کیا لیکن وہ ایک لفظ بھی نہیں بولا۔ انھیں یہ فرض کر لینا معقول لگا کہ پہاڑ دراصل ایک ایسی ڈھال کی طرح تھے جنھوں نے ٹڈی دل کو واپس موڑ دیا۔ اس لیے و ہ پہاڑوں کی دوسری جانب ایسے سبز میدان کی موجودگی کا امکان رد نہیں کر سکتے تھے جو ترفیل کے پتوں سے بھرا ہوا ہو۔ رگینڈاس پہلے ہی منصوبہ بندی کر چکا تھا۔ وہ جنوب میں پہاڑیوں کی طرف جائے گا جبکہ اس کا دوست شمال کی طرف سفر جاری رکھے گا۔ کراؤس نے اس سے اتفاق نہ کیا۔ گھوڑوں کی حالت دیکھتے ہوئے یہ اندازہ لگانا مشکل نہیں تھا کہ ان کو بھاگنے پر آمادہ نہیں کیا جا سکتا۔

اس طوفان کا تذکرہ کرنا بھی ضروری ہے جو بادلوں میں بن رہا تھا۔ کراؤس نے صاف انکار کر دیا۔ بحث و تکرار سے اکتا کر رگینڈاس نے اعلان کیا کہ وہ دو گھنٹے میں واپس آ جائے گا اور گھوڑے پر سوار ہو گیا۔ اس نے گھوڑے کو ایڑ دی جس نے دھماکہ خیز اعصابی توانائی کے ساتھ اس کا جواب دیا۔ گھوڑا ا ور سوار دونوں پسینے میں شرابور تھے۔ یوں لگتا تھا جیسے وہ سمندر سے نمودار ہوئے ہیں۔ اس کے زمین پر پاؤں رکھنے سے قبل ان کے پسینے کے قطرے،نمکین نشانات چھوڑتے ہوئے، بخارات میں تبدیل ہو گئے۔ رگینڈاس سیدھے خط میں سفر کر رہا تھا۔

پہاڑو ں کی چوٹیاں جن پر اس نے اپنی نظریں جمائی ہوئی تھیں تبدیل ہوتی جا رہی تھیں۔ پہاڑوں کی سرمئی چوٹیاں اپنی جگہ تبدیل کرتی جا رہی تھیں۔ گو ان کا حجم نمایاں طور پر بڑھ نہیں رہا تھا مگر وہ تعداد میں زیادہ ہو کر ایک دوسرے سے دور ہٹتی جا رہی تھیں۔ ان میں سے ایک پراسرار انداز میں اس کے پیچھے آ کر کھڑی ہو گئی۔ وہ پہلے سے ہی ان کے درمیان موجود تھا (یہی وجہ ہے کہ یہ’ ایل مونی گوٹ‘ یعنی ’پُتلا‘کہلاتی تھیں)۔ زمین یہاں تک بھی چٹیل تھی۔ اور ایسے کوئی آثار نہیں تھے کہ آگے یاکسی اور سمت میں بھی گھاس کانام و نشان ملے گا۔ ہوا کا ٹھہراؤ اور حرارت، اگر ایسا ممکن تھا، تو شدید تر ہو چکا تھا۔

وہ رک گیااور اس نے چاروں طرف نظر دوڑائی۔ وہ مٹی کے چولہے کی ساخت کے حامل وسیع ایمفی تھیٹر کے وسط میں کھڑا تھا۔ اسے محسو س ہوا کہ اس کا گھوڑا شدید اضطراب کا شکار تھا۔ اس کے سینے میں کھنچاؤ محسوس ہورہا تھا۔ اور اس کے محسوسات غیر معمولی حد تک شدید ہو چکے تھے۔ ہوا سرمئی رنگ میں تبدیل ہو چکی تھی۔ اس نے ایسی روشنی کبھی نہیں دیکھی تھی۔ ایسی تاریکی تھی جس کے آرپار دیکھا جا سکتا تھا۔ بادل اور نیچے آ گئے تھے، اور اب اسے کہیں کہیں گرجنے کی آواز بھی سنائی دیتی تھی۔ ’’کم ازکم اب ٹھنڈ ہو جائے گی۔‘‘ اس نے اپنے آپ سے کہا۔ ان غیر اہم الفاظ کے ساتھ اس کی زندگی کے ایک اہم مرحلے کا خاتمہ ہو گیا۔ یہ اس کی نوجوانی کے دوران اس کے ذہن میں پیدا ہونے والے آخری مربوط خیالات تھے۔

اس کے بعد جو ہوا وہ اس کے فہم میں اترنے کے بجائے براہِ راست اس کے اعصاب میں داخل ہو گیا۔ بہ الفاظِ دیگر یہ بہت جلدی ہوا۔ یہ ایسا عمل تھا جو وحشیانہ واقعات کے تسلسل کا حامل تھا۔ بجلی کی تیز چمک کے ساتھ، جس نے آسمان پر واضح طور پر ایک پیچدارقوس بنائی۔ اچانک زوردار طوفان کا آغاز ہو گیا۔ یہ چمک اتنی قریب آئی کہ رگینڈاس کے چہرے پر، جو اوپر کو اٹھا ہوا تھا، مکمل طور پر دودھیا روشنی میں نہاتے ہوئے ایک احمقانہ تاثر ثبت ہو گیا۔ اسے خیال آیا کہ بجلی کی حرارت کو اس نے اپنی جلد پر محسوس کیا ہے، اور اس کی آنکھیں بہت سکڑ گئیں۔ نیچے اترتی گرج نے اس کے جسم کو غیر ممکن طریقے سے لاکھوں کروڑوں ارتعاشات سے بھر دیا۔

اس کے نیچے موجود گھوڑا مڑنے لگا۔ وہ ابھی مڑ رہا تھا کہ بجلی اس کے سر پہ آ کے گری۔ انسان اور حیوان نکل کے بنے ہوئے ایک تابوت کی طرح بجلی سے روشن ہو گئے۔ اس بھیانک لمحے میں، جسے افسو س ناک طریقے سے بارِ دگر بھی ہو نا تھا، رگینڈاس نے اپنے جسم کو جگمگاتے دیکھا۔ گھوڑے کی گردن کے بال سورڈ فش کے چانوں کی طرح کھڑے تھے۔ اس لمحے کے بعد کسی خود ساختہ تباہی کے شکار تمام افراد کی طرح وہ یہی سوچتا رہا کہ اسے ایسا کرنے کی کیا ضرورت تھی۔ برق آمیز لہو کا حامل ہونے کا احساس ہولناک مگر مختصر تھا۔ بظاہر کرنٹ اس کے جسم میں داخل ہو کر باہر نکل گیا تھا۔ اگر ایسا ہوا بھی تھا تو اس کی صحت کے لیے اچھا نہیں تھا۔

گھوڑااپنے گھٹنوں پر گر چکا تھا۔ سوار اسے جنونیوں کی طرح ٹانگیں مار رہا تھا۔ وہ اپنی ٹانگیں ہوا میں تقریباً الف کرتا اور اس کے بعد انھیں قینچی کی طرح نیچے لاتا۔ بجلی کا چارج جانور کے جسم سے بھی باہر نکل رہا تھا اور اس کے ارد گرد سنہری تھال کا ایک خاکہ سا بن چکا تھا۔ جیسے ہی برقی رو اس کے بدن سے خارج ہوئی چند ہی سیکنڈوں میں گھوڑا دوبارہ اپنے پاؤں پر کھڑا ہو گیا اور چلنے لگا۔ سر پہ موجود بادلوں کی بھری ہوئی بیٹری سے دوبارہ ایک دھماکہ خیز آواز آئی۔ نصف شب جیسی تاریکی میں چھوٹی اور بڑی بجلیاں کڑکنے لگیں۔

کمروں کے حجم کی گیندیں پہاڑی ڈھلانوں سے نیچے لڑھکنے لگیں۔ شہابیوں کے اس بلیئرڈ کے کھیل میں کڑکتی ہوئی بجلیاں کھیلنے والی چھڑی کا کام کرنے لگیں ۔گھوڑا مڑ رہا تھا۔ مکمل ماؤف جسم و ذہن کے ساتھ رگینڈاس نے اس کی لگام کو پکڑنے کی کوشش کی جو اس کے ہاتھ سے چھوٹ گئی۔ میدان بہت وسعت اختیار کر چکا تھا۔ اور کہیں بھی بھاگنے کی جگہ نہیں تھی۔ وہاں پیش آنے والی برق کی کارگزاری اتنی شدید تھی کہ کوئی جائے فرار نہیں تھی۔ گرتی ہوئی ہر بجلی کے ساتھ زمین گھنٹی کی طرح مرتعش ہوتی۔ گھوڑا کسی ماورائی طاقت کے زیرِ اثر اپنے سُم اٹھاتا ہوا آہستہ آہستہ چلنے لگا۔

اس پر بجلی کا دوسرا حملہ پہلے کے تقریباً پندرہ سیکنڈ بعد ہوا۔ یہ پچھلے سے بہت زیادہ طاقتور اور تباہ کن اثرات کا حامل تھا۔ گھوڑا اور سوار دونوں سرد بون فائر کی طرح چمکتے اور کڑکڑاتے ہوئے بیس میٹر دور جا کر گرے۔ گرنے سے انھیں زیادہ چوٹ نہیں آئی کیونکہ بجلی ان کے جسم کی مالیکیولی اور ایٹمی ساخت کو کچھ تبدیل کر چکی تھی۔ اٹھنے پر وہ اچھلے۔ صرف اتنا ہی نہیں کہ گھوڑے کی کھال کی مقناطیسیت نے رگینڈاس کو اس وقت اپنے ساتھ چپکا ئے رکھا جب وہ ہوا میں اڑ رہے تھے۔ مگر جب وہ زمین پر پہنچے تو ان کے درمیان موجود کشش غائب ہو گئی اور رگینڈاس نے خود کو خشک زمین پر لیٹے ہوئے اور آسمان کی طرف دیکھتے ہوئے پایا۔

بادلوں میں چمک کی آڑی ترچھی لکیریں بھیانک خواب جیسی شکلیں بنا اور مٹا رہی تھیں۔ان کے درمیان اسے، ایک سیکنڈ کے کچھ حصے کے دوران، ایک خوف ناک چہرہ نظر آیا: پُتلا! اس کے ارد گرد بہرہ کر دینے والاشور تھا: گرج در گرج، دھماکے پر دھماکہ۔ یہ صورتِ حال غیر معمولی طور پر شدید تھی۔

گھوڑاکیکڑے کی طرح دائروں میں چکر کھا رہا تھا۔ ہزاروں بارودی خول اس کے اردگر د پھٹ رہے تھے۔ ایسا لگ رہا تھا کہ اس کے جسم کے گرد ہالہ بنا رہے ہوں۔ ایسا ہالہ جو جانور کے ساتھ ہی حرکت کر رہا تھا مگر اسے چھیڑ نہیں رہا تھا۔ کیا آدمی اور اس کا گھوڑا چیخے چلائے؟ صدمے سے وہ ماؤف ہو چکے تھے۔ اگر وہ چیختے بھی تو بہرحال ان کی آوازیں سنائی نہیں دے پاتیں۔ زمین پر گرے ہوئے گھڑ سوار نے  ہاتھوں کے زور کو مجتمع کرتے ہوئے اٹھنے کی کوشش کی۔ مگر زمین پر اتنا برقی اثر تھا کہ اس پر ہاتھ رکھنا ممکن نہیں تھا۔ وہ یہ دیکھ کر خوش ہوا کہ گھوڑا کھڑا ہوا گیا ہے۔ اسے جبلی طور پر یہ احساس ہوا کہ یہ اچھی بات تھی۔ اس کے لیے یہ عارضی جدائی تیسری مرتبہ بجلی کے ٹکرانے سے بہترتھی۔

گھوڑا اپنے پاؤں پر کھڑا ہو گیا۔ اس کے بدن کے بال کھڑے تھے اور وہ حجم میں بھی پہلے سے زیادہ محسوس ہو رہا تھا۔ بجلی کے جال سے گریزاں ہوتے ہوئے اس کی زرافے جیسی ٹانگیں خم زد ہ نظر آئیں۔ا س نے اپنی گردن موڑی— دیوانگی کی پکار سنی— سرپٹ دوڑ کھڑا ہوا۔

رگینڈاس بھی اس کے ساتھ ہی گیا! اسے کچھ سمجھ نہ آئی اور نہ ہی وہ کچھ سمجھنا چاہتا تھا۔یہ سب بہت دیو ہیکل تھا۔اسے محسوس ہوا کہ اسے کھینچاجا رہا تھا، بجلی نے اسے لچک دار بنا دیا تھا، کسی سیارے کی طرح جو کسی خطرناک ستارے کی کشش میں ہو۔ رفتار تیز ہوئی اور وہ ساتھ اچھلتاہوا، حیرت زدہ کھنچتا چلا گیا۔

اسےاحساس نہیں ہواکہ اس کا پاؤں رکاب میں پھنس چکا تھا، گھڑسواری کے ایک کلاسیکی،  روایتی حادثے کی طرح، جو اتنی تکرار کے باوجودبدستور ہوتا رہتا ہے۔ برقی حملے اچانک رک گئے تھے۔ یہ زیادہ خطرنا ک بات تھی کیونکہ اگر بجلی اب  نشانے پر گرتی تو وہ اس جانور کو بھاگنے سے روک سکتی تھی۔ اور شاید اس سے مصور کو پیش آنے والی مشکلات کا خاتمہ ہو جاتا۔ مگر برق واپس ابر میں چھپ گئی، ہوا رک گئی، بارش ہونے لگی۔

یہ کوئی نہیں جانتا گھوڑا کتنی دور سرپٹ بھاگتا رہا، نہ ہی یہ جاننے کی ضرورت تھی۔ کم یا زیادہ فاصلہ جتنا مرضی ہو، جس تباہی نے ہونا تھا وہ ہو چکی تھی۔ کراؤس اور بوڑھے گائیڈ کو اگلی صبح تک اس کا کوئی نام و نشان نہ ملا۔ گھوڑے کو سبزہ مل چکا تھا۔ وہ غنودگی کے عالم میں چل رہا تھا اور اس کی رکاب کے ساتھ ایک خون آلود گٹھڑی بھی پڑی ہوئی تھی۔ تمام رات اپنے دوست کی تلاش کے بعد بچارے کراؤس کا ذہن ماؤف ہو چکا تھا اور اس نے اسے مردہ سمجھ لیا تھا۔ اس کا مل جانا بھی کوئی تسلی بخش بات نہیں تھی۔ وہ انھیں مل چکا تھا مگر شکستہ اور بے حرکت حالت میں۔ وہ بھاگتے ہوئے اس  کے پاس گئے۔

اورجب وہ اس کے قریب پہنچے تو انھوں نے دیکھا کہ وہ منھ کے بل لیٹا ہوا تھا جیسے زمین کو چوم رہا ہو۔ و ہ حرکت کر رہا تھا۔ ان کی رہی سہی امید اس وقت غارت ہو گئی جب انھوں نے دیکھا کہ وہ خود حرکت نہیں کر رہا  بلکہ گھوڑے کے خوراک کی تلاش میں اٹھنے والے قدم اسے ہلا جلا رہے تھے۔ وہ گھوڑوں سے نیچے اترے۔ رکاب سے اس کا پاؤں سیدھا کیا۔ وہ خوف سے ٹھٹک کررہ  گئے۔

 رگینڈاس کاساراچہرہ سوج کر خون آلود لوتھڑے میں تبدیل ہو چکا تھا۔اس کی پیشانی کی ہڈی نظر آرہی تھی اور اس کی جلد کے پارچے اس کی آنکھوں پر لٹک رہے تھے۔ اس کی عقابی ناک، جو آگس برگ سے اس کے تعلق کی پہچان تھی ، ناقابلِ شناخت ہو چکی تھی۔ اور اس کے ہونٹ دولخت ہو کر الگ الگ ہو چکے تھے۔ اس کے دانت نظر آ رہے تھے مگر وہ معجزانہ طور پر سلامت تھے۔

سب سے پہلے یہ بات دیکھنا تھا آیا وہ سانس لے رہا تھا۔ و ہ لے رہا تھا۔ اس امر نے بعد ازاں رونما ہونے والے واقعا ت کو تیز تر کر دیا۔ انھوں نے اسے گھوڑے کی پشت پر لادا اور روانہ ہو گئے۔ ان کے گائیڈ کو، جو اپنی رہبرانہ صلاحیتیں واپس حاصل کر چکا تھا، یاد آیا کہ قریب ہی کچھ باڑے ہیں اور اس نے ان کی طرف جانے والے راستوں کی طرف اشارہ کیا۔ وہ اس شکستہ گٹھڑی کو لادے صبح کے وقت غریب اور دور افتادہ رہائش پذیر کسانوں کے گاؤں میں پہنچے جو ان کے لیے کافی تکلیف دہ عمل تھا۔ یہاں انھیں رگینڈاس کو کم از کم ابتدائی نوعیت کی امداد دینے اور صورتِ حال سے پیدا ہونے والے نقصان کا تخمینہ لگانے کا موقع مل جاتا۔

انھوں نے اس کا چہرہ دھلوایا اوراپنی انگلیوں کی پوروں سے اسے یکجا کرنے کی کوشش کی۔ زخموں کے اندمال کے لیے انھوں نے اس کے چہرے پر طلسمی پتوں کامر ہم لگایا اور دیکھا کہ کہیں اس کی کوئی ہڈی تو نہیں ٹوٹی۔اس کے کپڑے پھٹ چکے تھے۔ مگر کہنیوں، گھٹنوں او ر سینے پر زخموں کے علاوہ اس کا باقی بدن سلامت تھا۔ زیادہ نقصان اس کے سر کے حصے میں ہوا تھا۔ جو یہ گواہی دیتا تھا کہ اسے بہت دور تک کھینچا گیا ہے۔کیا یہ پُتلے کا انتقام تھا؟کون جانے! بدن بھی عجیب چیز ہے۔ اور جب یہ کسی ایسے حادثے کا شکار ہوجاتا ہے جس میں غیر انسانی طاقتیں ملوث ہوں تو کسی طرح بھی نتائج کی پیش گوئی نہیں کی جا سکتی۔