سچ ہے کہ کتاب رکھنے والے شخص کو بغیر کسی ڈر کے عزت کی نگاہ سے دیکھا جاتا ہے، چاہے وہ  معاشرہ ترقی پذیر ہو یا ترقی یافتہ۔ اس حقیقت کو مد نظر رکھتے ہوئے میکونگ ڈیلٹا کے گاؤں فاٹ ڈٹ میں سائیکلوں کی مرمت کا کام کرنے والا اَن پڑھ  پیئرے بوئی جہاں بھی جاتا اپنے ساتھ ایک کتاب ضرور رکھتا۔

اس کے فوراً ہی طلسماتی اثرات   سامنے آئے: بھکاری اور طوائفیں اس کے سامنے ہچکچانے لگے،  لٹیرے اسے لوٹنے کی ہمت نہ کرتے اور بچے اس کی موجودگی میں ہمیشہ چپ سادھے رہتے۔

شروع شروع میں  پیئرے بوئی اپنے ساتھ ایک کتاب رکھتا تھا،لیکن پھر اسے محسوس ہوا کہ زیادہ کتابیں پاس رکھنے سے وہ مزید اچھا تاثر قائم کر سکے گا۔ پس وہ  کہیں بھی آتے جاتے ہوئے بہ یک وقت  اپنے ساتھ تین کتابیں رکھنے لگا۔ تیوہار کے دنوں میں جب گلیوں بازاروں میں ہجوم بڑھ جاتا تو  پیئرے بوئی اپنے ساتھ درجن بھر کتابیں لیے گھومتا۔

اس سے فرق نہیں پڑتا تھا کہ وہ کسی قسم کی کتابیں ہوتی تھیں— دوستوں کو کیسے جیتا اور لوگوں کو کیسے متاثر کیا جائے، ہمارے جسم، ہماری ذات،  خوابوں میں جینا وغیرہم جیسی کتابیں—  بس کتابیں ہونا چاہئیں تھی۔  لگتا تھا کہ  پئیرے بوئی کو چھوٹی لکھائی والی موٹی کتابیں پسند تھیں۔ شاید  اسے گمان تھا کہ ایسی کتابیں زیادہ عالمانہ ہوتی ہیں؟ اس کے تیزی سے بڑھتے ہوئے کتب خانے میں دنیا  بھر کی بے شمار عالمانہ و فاضلانہ کتب اور  دنیا کے بڑے بڑے شہروں  پر تحقیقی کتب موجود پائی جاتی تھیں۔

پئیرے بوئی کے لیے سائیکلوں کے ایک  کاریگر کی معمولی سی تنخواہ میں اتنی کتابیں خریدنا آسان نہیں تھا۔ اسے کھانے کے علاوہ اپنے تمام اخراجات بچانا پڑتے تھے۔ کئی کئی روز تک  وہ شکر کے ساتھ روٹی کے علاوہ کچھ نہیں کھاتا تھا۔ پئیرے بوئی نے کبھی اپنی کتب کی انمول جلدوں کو فروخت نہیں کیا تھا۔ گاؤں کے لوگوں سے ملنے والی عزت  اس کے پیٹ کی مستقل گڑگڑاہٹ سے زیادہ اہم تھی۔

کو کتابوں پر یقین کرنے کا صلہ ۱۹۷۲ء کی جنگ کے دوران میں ملا جب جنگ کے دوران ایک شدید جھڑپ میں اس کی گھاس والی جھونپڑی کے سوا، جہاں  پئیرے بوئی دس ہزار کتابوں میں چاروں اطراف سے گھرا ہوا اپنے آپ کو  غیرمحفوظ سمجھتے ہوئے لرز رہا تھا،    اس کے گاؤں تمام گھروں کو آگ لگا  دی گئی۔

:::