شیخ حابی اپنے گھر کے سامنے چھوٹے سے باغ میں ٹہل رہے تھے کہ اچانک قدموں کی آہٹ سنائی دی۔ غور سے دیکھا تو محسوس ہوا کہ ایک نوجوان بوجھل قدموں کے ساتھ بڑی مشکل سے آگے بڑھ رہا ہے۔ چہرہ گرد و غبار میں اٹا ہوا تھا اور آنکھوں میں خوف و دہشت نمایاں تھی۔ نوجوان کے ہاتھ میں بانسری تھی۔ شیخ حابی اُس نوجوان کے قریب جانے میں ہچکچانے لگے۔ وہ آہستہ آہستہ شیخ کی طرف بڑھ رہا تھا۔ اس کی دھیمی آواز اب صاف سنائی دے رہی تھی۔ وہ شیخ حابی کو پکار رہا تھا۔ ’’آپ ہی شیخ حابی ہیں؟‘‘

’’کیا مطلب ہے تمھارا، بیٹا؟‘‘

نوجوان شیخ حابی کے سامنے گر گیا۔ وہ فوراً اس کی طرف لپکے اور اپنے دونوں بازوؤں سے اُٹھا کر اسے سینے سے لگا لیا اور پوچھا۔ ’’کیا تم بیمار ہو؟‘‘

’’نہیں… مجھے بھوک لگ رہی ہے۔

’’شیخ حابی اُسے لے کر فوراً اپنے گھر کی طرف آئے اور دروازے کے پاس کھلی چھت کے نیچے بٹھا کر دودھ سے بھرا ہوا ایک گلاس لے آئے۔ اُس انجانے نوجوان نے سیر ہو کر دودھ پیا، پھر لمبی سانس بھری اور شیخ کا شکریہ ادا کیا۔کچھ دیر تک خاموشی چھائی رہی۔ پھر نوجوان نے سر اُٹھایا اور حیرانی سے شیخ کو دیکھنے لگا۔ شیخ صاحب نے محبت و شفقت سے مسکراتے ہوئے کہا۔ ’’بولو بیٹا، کیا بات ہے! ڈرنے کی ضرورت نہیں۔ تمھارا کیا مسئلہ ہے؟ شیخ حابی کسی سوالی کو خالی ہاتھ نہیں بھیجتے!‘‘

نوجوان نے شیخ کا ہاتھ تھام لیا اور گرمجوشی سے دباتے ہوئے کہا۔ ’’مجھے پتہ چلا ہے کہ آپ صاحبِ کرامت ہیں… میں آپ سے ایک کرامت چاہتا ہوں!‘‘

شیخ حابی نوجوان کے چہرے کو غور سے دیکھنے لگے۔ وہ اس غبار آلود اور تھکے ہوئے شخص کے دل میں چھپے راز کو جانچنے کی کوشش کرنے لگے۔ تھوڑی دیر بعد شیخ نے کہا۔ ’’کرامت؟ اے میرے بچے، میں نجومی نہیں ہوں۔‘‘

’’آپ نجومی سے بھی بڑے ہیں!‘‘

’’تم کیا چاہتے ہو بیٹا؟ صحیح سے بتاؤ۔‘‘

’’“آپ کا تعویذ اور دوا خدائی طاقت رکھتی ہے!‘‘

’’نہیں بیٹا، میں تو بس ایک عبادت گزار حکیم ہوں۔ میں لوگوں کا روحانی اور جسمانی علاج کرتا ہوں۔‘‘

’’نوجوان اپنے کپڑے سمیٹ کر بیٹھ گیا اور کہنے لگا ’’یہ سچ ہے کہ ایزیس میری روح کو میرے جسم سے دور لے گیا تاکہ وہ اس کی تربیت کر سکے…‘‘

’’بیٹا گھبراؤ نہیں، سکون سے بیٹھ جاؤ۔‘‘

’’میں اس بےکار مردہ جسم سے نفرت کرتا ہوں۔ آپ میری نئی تخلیق کر دیں اور مجھے با رعب، طاقتور اور صاحبِ اقتدار بنا دیں!‘‘

شیخ حابی نے محبت سے نوجوان کے سر پر ہاتھ پھیرا اور اسے نرمی سے اُٹھا کر اپنے پاس بٹھا لیا۔ پھر کچھ دیر بعد سنجیدگی سے کہا۔ ’’بیٹا، مجھے اپنی کہانی سناؤ۔ میں غور سے سنوں گا۔‘‘

نوجوان نے اپنا چہرہ ہتھیلیوں پر ٹکا لیا اور بڑے صحن میں ادھر اُدھر دیکھتا رہا۔ ہر طرف گھٹا ٹوپ اندھیرا اور خاموشی چھائی ہوئی تھی۔ کچھ دیر کے بعد وہ بولا۔ ’’میں راموسی ہوں… لیکن آپ کو میرے نام سے کیا لینا! ویسے بھی راموسی ایک اسمِ نکرہ ہے جس کی موجودگی کا کسی کو احساس نہیں…‘‘

’’بولو بیٹا!‘‘

’’میں یہاں سے دور ایک مہینے کی مسافت پر رہتا ہوں۔

’’اچھا…‘‘

’’ رنسی شہر میں۔‘‘ جی، چار معابد اور پانچ ستون والا شہر، جس کے ہر ستون کے چار کونے ہیں۔ جہاں شہزادی اشمس رہتی ہے۔‘‘

وہ کچھ لمحوں کے لیے خاموش ہوا پھر اچانک بولا۔ ’’میں بڑا بننا چاہتا ہوں!  میں دولت مند بننا چاہتا ہوں!  میری تجوریاں مال سے بھری ہوں۔ میں چاہتا ہوں… میں چاہتا ہوں!‘‘ شیخ حابی آہستہ سے مسکرائے اور اس کی بات کاٹتے ہوئے بولے۔ ’’یہ کوئی ناممکن بات نہیں۔‘‘

نوجوان خوشی سے دمک اُٹھا۔ ’’یعنی آپ میرے لیے یہ کرامت کر دیں گے؟‘‘

’’بیٹا، جس کو تم کرامت کہہ رہے ہو، میں اسے صرف ایک کام سمجھتا ہوں۔ اور یہ کام صرف چند لوگ ہی کر سکتے ہیں۔‘‘

راموسی خوشی سے اُچھل پڑا، شیخ کے ہاتھوں کو بوسہ دیا اور بولا۔ ’’شکریہ! شکریہ! میں آپ کا ہمیشہ شکر گزار رہوں گا! لیکن ابھی میرے پاس دینے کے لیے کچھ نہیں… سوائے…‘‘

وہ رک گیا۔ پھر اپنے پاس رکھی بانسری کے ساتھ ایک چھوٹی دھاتی چیز شیخ کے سامنے رکھ دی۔ ’’یہ جو کچھ بچا ہے، اسی کا میں مالک ہوں۔ یہ آپ کے لیے ہے۔ میں جانتا ہوں یہ بہت تھوڑا ہے۔‘‘

’’ہرگز نہیں، بیٹا! یہ تمھارے لیے بہت ہے۔ مجھے لوگوں کے عطیات کی ضرورت نہیں۔‘‘شیخ حابی اُٹھے۔ ’’بیٹا، ٹھنڈ بڑھ رہی ہے، آؤ اندر چلیں۔‘‘

دونوں کھلی چھت چھوڑ کر ایک کم چھت والے کمرے میں آگئے جس کی چھت گھاس پھوس سے ڈھکی ہوئی تھی۔ شیخ حابی نے تیل کا چراغ روشن کیا، دیوار سے ٹیک لگا کر بیٹھ گئے۔ راموسی سامنے بیٹھ گیا۔ چراغ دونوں کے درمیان تھا۔کچھ دیر خاموشی رہی۔ پھر شیخ نے کہا۔ ’’بیٹا، بولو۔ میں سن رہا ہوں۔‘‘

راموسی چراغ پر نظریں جمائے بولا۔ ’’میں آپ کو اپنی کہانی کیسے سناؤں؟ کہاں سے شروع کروں؟ جس کے بارے میں میں سوچتا ہوں وہ پاگل پن ہے، دیوانگی ہے… مگر میں اس پر شرمسار نہیں۔ میں بےکار زندگی گزار رہا تھا۔ اپنے مسمار گھر سے نہر تک جاتا، شہزادوں کے باغوں کے قریب گھومتا۔ پھولوں کی خوشبو سے لطف اندوز ہوتا۔ تھک جاتا تو ساحل کے پاس لیٹ کر اپنی بانسری بجاتا۔‘‘

’’کیا تم موسیقار ہو؟‘‘

’’نہیں… بس اپنے لیے گنگناتا ہوں۔‘‘

وہ بانسری دکھاتے ہوئے بولا۔ ’’یہ میری ساتھی ہے۔ میرے سارے راز جانتی ہے۔ میرے دل میں جو بھی لالچ یا سکون ہے… یہ سب جانتی ہے۔ شیخ، میں نے خود کو آپ کے حوالے کر دیا ہے۔ جیسے چاہیں، میری صورت گری کیجیے۔‘‘

’’کیا تم اپنی پرسکون زندگی میں خوش نہیں؟‘‘

’’بالکل خوش ہوں۔‘‘

’’پھر وہی تمھاری حالت بدل سکتی ہے۔‘‘

’’وہ کون؟‘‘

’’وہی جس کا ذکر تم نے رنسی شہر کے ساتھ کیا تھا…‘‘

’’اچھا… اشمس! شہزادیوں کی شہزادی!‘‘

’’اپنی بات پوری کرو!‘‘

راموسی نے گہری سانس لی۔ ’’ایک دن میں نے اسے دیکھا… اس کے حسن نے مجھے پہلی نظر میں دیوانہ کر دیا۔ میں درختوں کے پیچھے سے اسے دیکھتا رہا۔ میرا دل روشنی سے بھر گیا۔ ایک نئی دنیا سامنے آگئی۔ میں نے وعدہ کیا کہ وہ صرف میری ہے۔ مگر میں نہ پیچھے ہٹ سکتا تھا، نہ آگے بڑھ سکتا تھا۔ اس دن کے بعد میں روز اس باغ کے راستے چلنے لگا۔ وہ مجھے نہیں دیکھتی تھی، میں اسے دیکھتا رہتا تھا۔

’’میں نے اپنے لیے اندھیرا مقام چن لیا۔ اپنی بانسری میں اپنے دکھ سمیٹا۔ کبھی کسی سرگوشی کی طرح آواز آتی: کیوں اس کے نزدیک نہیں جاتے؟ کیوں اپنی بات نہیں کہتے؟