اُس نے اپنی کمر کو سہلائے جانے دیا، جس کے نچلے حصے پر پسینے کے قطرے تھے، اُس کابدن تیزآنچ پر جلائی گئی شکر کی خوشبو خارج کررہاتھا، خاموشی تھی، اُس کے تصور میں تھاکہ ایک آواز تک اُس کی یادداشت میں داخل ہوکر سب کچھ برباد کر دے گی، اُس لمحے کو خاک میں ملادے گی جس میں وہ ہر اُس آدمی کی طرح تھا جو اُسے ملا، ایک اتفاقیہ عاشق جو اُسے اُس دِن ملاتھا، ایک اور مرد جس کے ساتھ ماضی کی شناسائی نہیں تھی جو اُس کے بالوں کی گندمی رنگت کی وجہ سے اُس کی طرف متوجہ ہوا، اُس کی چھائیوں والی جلد، اُس کے خانہ بدوش کڑوں کی جھنجناتی آواز، محض ایک آدمی جس نے اُس کے ساتھ بات کی اور ساتھ چل پڑا، بغیر کسی مقصد کے، ٹریفک اور موسم پر رائے دیتے ہوئے، ارد گرد لوگوں کو دیکھتے ہوئے، اُس کے اپنے ہم وطنوں کی دیار ِ غیر میں زبردستی کی پیداکی ہوئی معمولی سی خود اعتمادی کے ساتھ، دکھ اور غصے سے عاری آدمی، ہر قسم کے جرم کے احساس سے تہی، برف کی طرح پاکیزہ، جو اُس کے ساتھ صرف دِن گزارنا چاہتاتھا، کتابوں کی دکانوں اور پارکوں میں گھومتے ہوئے، کوفی پیتے ہوئے، ملاقات کے موقع کی خوشی مناتے ہوئے، پرانے وقتوں کی یادوں پر بات کرتے ہوئے، جب دونوں ایک ہی شہر میں بڑے ہو رہے تھے تو تب زندگی کیسی تھی، وہ ایک ہی کٹرے کے رہائشی تھے، جب اُن کی عمریں چودہ برس تھیں، تمھیں یاد ہے، پالے کے سبب گیلے جوتے، پیرافیِن سے جلنے والے چولہے، آڑو کے درختوں کی چھاؤں، یہ سب اب اُس ممنوعہ ملک میں رہ گیا۔ شاید وہ کچھ کچھ تنہائی محسوس کر رہی تھی، یا شاید کسی اُلجھن میں اُلجھے بغیر ہم بستری کا موقع تھا، لیکن، جو بھی وجہ ہو، دِن کے اختتام پر، جب اُن کے پاس مزید گھومنے کا کوئی بہانہ نہ رہا، اُس نے اُس کا ہاتھ تھامااور اپنے گھر میں لے گئی۔  وہ پیلی عمارت میں،جس کی گلی کے اختتام پر کوڑادانوں کا ڈھیر تھا، ایک بھدے سے اپارٹمنٹ میں دوسرے جلاوطنوں کے ساتھ رہتی تھی۔ اُس کا کمرہ نہایت مختصر تھا: فرش پر ایک گدا بچھاتھاجسے دھاری دار کمبل ڈھانپے ہوئے تھا، اینٹوں کی دوقطاروں کے اوپر پھٹوں سے کتابوں کی عارضی الماری بنائی ہوئی تھی، کتابیں، پوسٹر، کرسی پر پڑے ہوئے کپڑے، ایک کونے میں رکھاسوٹ کیس۔ وہ تمہید کے بغیر بے لباس ہو گئی، اُس بچی کے رویے کی طرح جو خوش کرنے کے لیے بے چین ہو۔ اُس نے اُس کے ساتھ مباشرت کی کوشش کی۔ اُس نے تحمل کے ساتھ اُس کے بدن کو سہلایا، چوٹیوں اور وادیوں میں پھسلتے ہوئے، اُس کی خفیہ راہوں کو کھوجتے ہوئے، سفید چادر پر مٹی گوندھتے ہوئے ، تاوقتیکہ وہ پسیج کر اُس کے لیے تیار تھی۔ اُس نے خود کو مجتمع کیا، اُس کی طرف بڑھی، اُس کا سر اُس کے پیٹ پرتھا، چہرہ چھپا ہوا، جیسے شرم کی مجبوری ہو، پیار سے تھپتھپایا، چوما، مہمیز کیا۔ اُس نے اپنے ذہن کو خالی کرنے کی کوشش کی، اُس نے اپنی آنکھیں بند کر لیں اور کچھ دیر اُسے وہ کرنے دیاجو وہ کر رہی تھی، اُس وقت تک جب تک تنہائی یاشرم نے اُسے شکست نہیں دے دی، پھر اُس نے اُسے پرے دھکیل دیا۔ اُنھوں نے ایک سگریٹ سلگایا، دونوں کے درمیان اب کوئی شراکت نہیں تھی، متوقع شدت،  جس نے اُنھیں دِن بھر جکڑ رکھاتھااب نہیں رہی تھی، باقی جو بچاوہ گدے پر لیٹے ہوئے دو غیر محفوظ اور کمزور لوگ تھے جو یاد داشت کے بغیر تھے، جو اَن کہے الفاظ بھیانک خلا میں تیر رہے تھے۔ جب وہ صبح ملے تو اُنھیں غیر معمولی توقعات نہیں تھیں، اُن کا کوئی خاص منصوبہ نہیں تھا، اُنھیں صرف خوشگوار صحبت کی ضرورت تھی، اور کچھ لطف اندوزی، مخصوص وقت پر اُداسی نے اُنھیں اپنی لپیٹ میں لے لیا۔ ہم تھکے ہوئے ہیں، وہ مسکرائی، اُس ویرانی کا بہانہ نکالنے کے لیے جو اُن کے اوپر چھاچکی تھی۔ احساسات کو جگانے کی آخری کوشش میں اُس نے اُس کاچہرہ ہاتھوں میں لے کر پلکوں کو چوما۔ وہ ایک دوسرے کے پہلو میں لیٹے ہوئے تھے، ہاتھ تھامے ہوئے، اور اُس ملک کی باتیں کرتے ہوئے جہاں وہ اتفاق سے ملے تھے۔ ایک سرسبز اور بے لوث ملک جس میں وہ ہمیشہ غیر ملکی رہیں گے۔ اُس نے لباس پہن کر الوداع کہنے کا سوچا، اِس سے پہلے کہ اُس کے ڈراؤنے خوابوں کی شدت ماحول کو زہر آلود کر دے، لیکن وہ اتنی جوان اور غیر محفوظ نظر آ رہی تھی کہ وہ اُس کا دوست بننا چاہتاتھا۔ اُس کا دوست، اُس نے سوچا، عاشق نہیں، اُس کی تنہائی میں ساتھ رہنے کے لیے، کسی قسم کی مانگ یا وعدے کے بغیر، کوئی ایسا جو اُس کے خوف بھگانے کے لیے اُس کے ساتھ رہے۔ وہ اُس کے پاس رہااور نہ ہی اُس کا ہاتھ چھوڑا۔ ایک نگھے، نرم احساس ، اُس کے اور اپنے لیے بے پناہ رحم بھرے جذبے نے اُسے اشکبار کر دیا۔ پرد ہ بادبان کی طرح پھڑپھڑایا، تو وہ کھڑکی بند کرنے کے لیے اُٹھی، شاید اندھیرااُن کے ساتھ رہنے کے ٹوٹے ہوئے جذبے کو جوڑنے میں کامیاب ہو جائے اور وہ مباشرت کر سکیں۔ لیکن اندھیراکسی کام نہ آسکا، اُسے گلی میں سے روشنی کے دائرے کی ضرورت تھی، اِس کے بغیر اُس نے خود کو نوے سینٹی میٹر کی کوٹھڑی کے لامحدود وقت کے اندھے کنوئیں میں پایا، ہوش و حواس کے بغیر اپنے ہی فضلے میں لت پت۔ پردہ ہٹارہنے دو، میں تمھیں دیکھنا چاہتاہوں ، اُس نے جھوٹ بولا، کیوں کہ وہ اندھیرے کے اپنے خوف اُس پر واضح نہیں کرنا چاہتاتھا، گلاچھیلتی ہوئی پیاس، کیلوں کے تاج کی طرح سر پر بندھی پُر اذیت پٹی، لمبی اور اندھیری سرنگوں کے خیال،  بھوتوں کے حملے۔ وہ یہ باتیں نہیں کر سکتاتھا، کیوں کہ ایک بات دوسری کے ساتھ منسلک ہو جاتی ہے، اور وہ سب وہ کہہ دے گا جو اُس نے پہلے کبھی نہیں کہاتھا۔ وہ گدے پر واپس آگئی، غیرحاضر دماغی سے اُسے تھپتھپایا، چھوٹے چھوٹے نشانات کو انگلیوں سے محسوس کیا، پریشان مت ہو،  یہ متعدی نہیں ، صرف معمولی سے زخم ہیں۔ وہ تقریباًایک آہ بھرتے ہوئے ہنسا۔ لڑکی اُس کی پریشانی کا اندازہ لگاتے ہوئے ایک دم رُک گئی، اُس کی حرکت معلق ہوگئی، وہ اب چوکس تھی۔ اُسے اُس وقت بتادیناچاہیے تھاکہ یہ نئی محبت کا آغاز نہیں تھا، ایک سرسری سا معاشقہ بھی نہیں، یہ تو ایک جنگ بندی کا لمحہ تھا، معصومیت کا ایک لمحہ، اور جلد ہی جب وہ سو جائے گی، وہ یہاں سے چلاجائے گا، اُسے بتادیناچاہیے تھاکہ مستقبل میں اُن کے لیے کچھ بھی نہیں تھا، کوئی خفیہ اشارے نہیں، وہ اب ہاتھوں میں ہاتھ ڈالے گلیوں میں نہیں گھومیں گے، نہ ہی عاشقوں والی کھیلوں میں ملوث ہوں گے، لیکن وہ بول نہیں پا رہاتھا، اُس کی آواز اُس کے اندر ہی کہیں چنگل میں پھنسی ہوئی تھی۔ وہ جانتاتھاکہ وہ ڈوب رہاہے، اُس نے اُس حقیقت کے ساتھ چمٹے رہنا چاہاجو اُس سے دور ہو رہی تھی، وہ اپنے ذہن کو کہیں پر بھی سہارا دینا چاہتاتھا، کرسی پر پڑے بے ترتیب کپڑوں کے ڈھیر پر، فرش پر پڑی کتابوں پر، دیوار پر لگے چلی کے پوسٹر پر، جزائر غرب الہند کی خنک شام پر، دور سے آتی گلی کی آوازوں پر، اُس نے اُسے پیش کیے گئے بدن کے بارے میں سوچنا چاہا، اُس کے لہکتے ہوئے بالوں پر سوچ مرتکز کرنی چاہی، اُس کے بدن سے اُٹھتی سوختہ شکر کی خوشبوکو ذہن میں رکھنا چاہا۔ اُس نے خاموشی کی زبان میں اُن لمحات کو بچانے کی کوشش کی، جب کہ بستر کے دوسرے سرے پر سادھو کی طرح آلتی پالتی مارے وہ اُس کا مشاہدہ کر رہی تھی، اُس کی زردی مائل چھاتیاں اور ناف کی آنکھ بھی اُس کا مشاہدہ کر رہی تھیں، وہ اُس کے کانپنے،  کپکپانے، دانتوں کے بجنے اور آہوں کاجائزہ لے رہی تھی۔ اُس نے سوچاکہ وہ خاموشی کو اپنے اندر بڑھتے ہوئے محسوس کر سکتاتھا، وہ جانتاتھاکہ وہ ریزہ ریزہ ہورہاہے، جیساکہ پہلے بھی کئی بار ہو چکاتھا، اور اُس نے حال پر اپنی آخری گرفت ڈھیلی کرتے ہوئے مدافعت ختم کردی، اُس نے خود کو پھسلتی ڈھلوان کے حوالے کر دیا،  اُس نے اپنے گھٹنوں اور کلائیوں پر سخت پٹی کو محسوس کیا، وحشیانہ تشدد، پھٹے ہوئے پٹھے، ناموں کو جاننے کے لیے بے عزتی کرتی ہوئی آوازیں، انا،  جسے اُس کے سامنے اذیت دی جاری تھی، کی ناقابل ِ فراموش چیخیں،اور دوسروں کی جنھیں صحن میں بازوؤں سے لٹکایاگیاتھا۔

معاملہ کیاہے؟ خدا کے لیے، بات کیا ہے؟ انا کی آواز کہیں دور سے سوال کر رہی تھی۔ نہیں، انا ابھی تک جنوب کی جگہ بدلتی ریت میں دھنسا ہواتھا۔ اُس نے سوچاکہ وہ ایک برہنہ لڑکی کو دیکھ سکتاتھاجو اُسے جھنجھوڑ اور اُس کانام پکار رہی تھی لیکن وہ لہراتے چابکوں اور پھڑپھڑاتے جھنڈوں کے خوف سے باہر نکل نہیں پا رہاتھا۔ وہ دہراہوگیاہواتھااور اُس کی تمام تر کوشش قے کے روکنے میں تھی۔ اُس نے اپنی انا اور دوسرے لوگوں کے لیے روناشروع کر دیا۔ کیاہوا؟  کیابات ہے ؟ لڑکی پھر کہیں سے اُسے بلا رہی تھی۔ کچھ نہیں ہوا، مجھے تھامے رکھو، اُس نے منت کی، وہ خائف سی اُس کی طرف بڑھی، اور اُسے بازؤں میں لے کر بچوں کی طرح تھپکنا شروع کر دیا، ماتھاچوما، کہا: جتنا رو سکتے ہو روؤ، اُسے گدے پر سیدھا لٹالیا، پھر مصلوب اُس کے اوپرلیٹ گئی۔

ایک ہزار سال وہ ایسے ہی اکٹھے لیٹے رہے،تاوقتیکہ بتدریج سراب ِخیال معدوم ہوتاگیااور اُس نے سب معاملات کے باوجود خود کوکمرے میں موجود اور زندہ پایا، وہ سانس لے رہاتھا،اُس کی نبض چل رہی تھی، لڑکی کاپورابوجھ اُس پر تھا، اپناسر اُس کی چھاتی پر رکھے ہوئے تھی،  اُس کے بازواور ٹانگیں اُس کے بازؤں اورٹانگوں پرتھیں، وہ دو خوف زدہ یتیم تھے۔ اُس لمحے جیسے کہ سب کچھ اُس کے علم میں تھا، اُس نے اُسے کہا، خوف خواہش ، محبت یا نفرت، احساسِ جرم یاوفاداری سے زیادہ طاقت ور ہے۔  خوف سب کو کھاجاتاہے—  اُس نے اُس کے آنسو اپنی گردن پر بہتے ہوئے محسوس کیے۔  سب کچھ تھم گیا، اُس نے اُس کے باطن میں دبے زخم کو چھو لیاتھا۔ اُس کا ماتھاٹھنکاکہ وہ ایک عام لڑکی نہیں تھی جوترس کھاتے ہوئے مجامعت کے لیے تیار تھی، وہ تو خاموشی کے پیچھے چھپی حقیقتوں سے آشنائی رکھتی تھی، مکمل تنہائی کے دوسری طرف، اُس مہر بند بکسے کے اُس طرف جہاں وہ کرنل اور خود اپنی غداری سے بچنے کے لیے چھپاتھا، انا ڈیاز اور دوسرے دھوکہ دیے گیے ساتھیوں سے دوسری طرف جہاں اُنھیں آنکھوں پر پٹیاں باندھ کر لیے جا رہاتھا۔  وہ یہ سب کیسے جان سکتی تھی؟

ٍوہ اُٹھ کر بیٹھ گئی۔ اُس نے جب سوچ کے لیے ٹٹولناشروع کیاتو اُس کاپتلابازو کھڑکی سے آنے والی زردی مائل دھند لاہٹ میں دھندلی تصویر کی طرح نظر آیا۔ اُس نے بتی جلائی اور ایک ایک کرکے اپنے دھاتی کڑے اُتارتے ہوئے انھیں بغیر کوئی آواز پیداکیے گدے پر رکھا۔ جب اُس نے اُس کی طرف ہاتھ بڑھائے تواُس کے بال آدھے چہرے کو ڈھانپے ہوئے تھے۔ اُس کی کلائیوں پر بھی سفید نشان تھے۔ وقت سے ورا ایک لمحے کے لیے اُس نے اُسے دیکھا، وہ ساکت تھا، تاوقتیکہ سب کچھ سمجھ گیا، محبت سے مغلوب، اُس نے بجلی کے تاروں کو اُس کے اردگردلپٹے دیکھا۔ وہ ایک دوسرے کے گلے لگنے کے بعد رو سکتے تھے، معاہدوں اور اعتماد کی بھوک میں، ممنوعہ الفاظ کے لیے، کل کے وعدوں کے لیے، اور آخر کار خفیہ ترین راز میں ساجھے داری کرنے کے لیے !

***