’’اگرتم یہ جاننا چاہتے ہو کہ میں نے ہاؤ داشو سے شادی کیوں کی تو مجھے آغاز مینڈکوں سے لینا پڑے گا۔ میں نے اپنی ریٹائرمنٹ کااعلان کیا توکچھ پُرانے دوست دعوت کے لیے جمع ہو گئے اور پینے سے میں ہَوا میں اُڑنے لگی… میں نے زیادہ نہیں پی تھی، ایک جام سے بھی کم لیکن وہ کوئی گھٹیا شراب تھی۔ ریستوران کے مالک ژائی بائی رہُوا کابیٹا ژائی ژیاؤک نے، جو ۶۳‘ کے قحط کے میٹھے آلوؤں جیسے لڑکوں میں سے ایک تھا، میرے اعزاز میں بہت تیز دُلیانگے کی ایک بوتل نکالی لیکن وہ نقل دُلیانگے تھی۔ میرا سر گھوم رہاتھا، ہر شخص جھوم رہا تھا اور بمشکل کھڑا ہونے کے قابل تھا اور ژائی ژیاؤک نے سب سے پہلے اُسے خود منھ سے لگایا اوراُس وقت تک لگائے رکھا جب تک کہ اُس کی آنکھیں اُبل کر حلقوں سے باہر نہ آگئیں۔

خالہ نے بتایا کہ وہ لڑکھڑاتی ہوئیں ریستوران سے نکلیں اور اُنھوں نے ہسپتال کے رہائشی علاقے کا رُخ کیا لیکن وہ بدحواسی میں ایک دلدلی علاقے کے ایک تنگ اور ہَوا کے تیز جھکڑوں والے راستے پر جا نکلیں۔ جس کے دونوں طرف سر تک بلند نرسل اُگے ہوئے تھے۔ اُن کے گرد پانی میں چاندنی شیشے کی طرح چمک رہی تھی۔ بڑے اور بچّہ مینڈکوں کے ٹرانے کی آوازیں پہلے ایک طرف اور پھر دُوسری طرف، آگے اور پیچھے سے یُوں آرہی تھیں جیسے وہ راگ الاپ رہے ہوں۔ پھر وہ ٹرٹراہٹیں ہر سمت سے آنے لگیں جن کی گُونج لہریں بن کر فضاء کا خلا بھر رہی تھیں۔ اچانک ہی مکمل سکوت چھا گیا جس میں جھینگروں کی چِر چِر شگاف ڈال رہی تھی۔

خالہ نے بتایا کہ طبی امداد دینے والی کی حیثیت سے اُنھوں نے آدھی آدھی رات اور اُس کے بعد تک بھی دُور دراز کے پہاڑی اور میدانی راستوں پر سفر کیا تھا لیکن اُنھیں کبھی خوف محسوس نہیں ہوا۔ مگر اُس رات خوف نے اُن کے رونگٹے کھڑے کر دیے۔ عموماً مینڈکوں کی ٹر ٹر کو ڈھولک کی تھاپ سے تشبیہ دی جاتی ہے لیکن اُس شب وہ اُنھیں انسانی چیخوں سے مشابہ لگ رہی تھیں جیسے ہزاروں نوزائیدہ بچّے رو رہے ہوں۔ اُنھوں نے بتایا کہ وہ اُن کی پسندیدہ آواز رہی تھی کہ ایک دایہ گیر ڈاکٹر کے لیے نومولود کے رونے کی آواز سے زیادہ دُنیا کی کوئی آواز رُوح پرور موسیقی کی حیثیت نہیں رکھتی۔ اُنھوں  نے کہا کہ اُنھوں نے اُس رات جو شراب پی تھی وہ اُن کے بدن سے ٹھنڈا پسینہ بن کر بہہ نکلی تھی۔ ’’یہ مت سمجھو کہ میں نشے میں دھت تھی اور مجھے تخیلاتی چیزیں نظر آرہی تھیں کیوں کہ جیسے ہی شراب میرے سر میں ہلکا ہلکا درد چھوڑتی ہوئی میرے مساموں سے نکلی میرا ذہن صاف شفاف ہو گیا تھا۔‘‘

دلدلی راستے پرچلتے ہوئے اُن کی محض اِتنی خواہش تھی کہ وہ کسی طرح اُس ٹر ٹر سے جان چھڑا لیں۔ لیکن کیسے؟ اُنھوں نے اُس سے جتنا بھاگنے کی کوشش کی اُتناہی کپکپی طاری کردینے والی ٹرٹر… ٹرٹر… ٹرٹر کی چہارسُو سے آنے والی غم زدہ چیخیں اُن کے گرد حصار تنگ کرتی چلی گئیں۔ اُنھوں نے بھاگنے کی کوشش کی لیکن بھاگ نہ پائیں۔ اُن کے جوتوں سے سریش دار رَاستہ چپک گیا کہ پیر تک اُٹھانا مشکل ہوگیا اور قدم اُٹھانے پر جوتوں کو راستے سے چپکانے والے چاندی جیسے دھاگے تڑ تڑ کی آواز سے ٹُوٹتے تھے۔ لیکن جیسے ہی وہ دوبارہ پاؤں زمین پر رکھتیں مزید دھاگے بن جاتے۔ لہٰذا اُنھوں نے ننگے پاؤں چلنے کے لیے جوتے اُتار دیے لین اِس اقدام نے کیچڑکی گرفت زیادہ مضبوط کر دی۔

خالہ نے بتایاکہ وہ ایک عظیم الجثہ مینڈک کی مانند ہاتھوں اور گھٹنوں کے بل رینگنے لگیں۔ اب کیچڑ اُن کے گھٹنوں، رانوں اور ہتھیلیوں سے چمٹ گیا لیکن وہ پروا کیے بغیر آگے کی طرف رینگتی رہیں۔ اُنھوں نے بتایا کہ عین اُسی لمحے چاندنی میں دمکتے نرسلوں اورللّی کے پودوں کے گہرے پردے کے عقب سے لاتعداد مینڈک کودے۔ اُن میں کچھ زمردیں اور کچھ پیلگوں سنہرے تھے۔ کچھ برقی استری جتنے بڑے اورکچھ کھجور جتنے چھوٹے تھے۔ اُن میں کچھ کی آنکھیں سونے کی گانٹھ جیسی تو کچھ کی سُرخ بیضوی منکوں جیسی تھیں۔

 وہ اُن پر سمندر کی لہروں کی طرح آ کر گرے کہ اُنھوں نے اپنی اشتعال بھری ٹرٹر سے اُنھیں ڈھانپ لیا اور لگتا تھا کہ اُن سب نے اپنے اپنے دانت اُن کے بدن میں گاڑ دیے ہوں اور بدن نوچنے کے لیے اُن کے تیز دھار ناخن اُگ آئے ہوں۔ جب وہ اُن کی پشت، گردن اور سر پر چھلانگیں لگا کر بیٹھے تو وہ اُن کے بوجھ سے کیچڑ بھری زمین پر گر گئیں۔اُنھوں نے بتایا کہ اُن کا بے تحاشا خوف اُن کے مستقلاً دانت گاڑنے یا بدن نوچنے کی بِناء پر نہیں بل کہ اُن کی سرد اور جھِلّی نُما جلد کی رگڑ کے کراہت آمیز اور ناقابلِ برداشت احساس کی وجہ سے تھا۔ ’’اُنھوں نے میرا جسم پیشاب سے بھر دیا تھا یا شاید وہ اُن کا مادۂِ تولید تھا۔‘‘

اُنھوں نے بتایا کہ اُنھیں اچانک اپنی دادی کی سنائی ہوئی ایک دیو مالائی کہانی یاد آگئی جو ورغلا کر آبروریزی کرنے والے ایک مینڈک کے بارے میں تھی۔ ایک شب ایک دوشیزہ کی دریا کے کنارے ٹھنڈی ٹھنڈی ہَوا کے جھونکوں میں آنکھ لگ گئی۔ اُس نے خواب دیکھا کہ سبز لبادے میں ملبوس ایک نوجوان نے اُس کے ہمراہ مواصلت کی۔ جب وہ بیدار ہوئی تو حاملہ تھی۔ نتیجتاً اُس نے مینڈکوں کا ایک جھول کو جنم دیا۔ اِس دہشت ناک تصوّر نے اُن کے اندر توانائی بھر دی اور اُنھوں نے اچھل کر اپنے پیروں پر کھڑے ہو کے مینڈکوں کو کیچڑ کی ڈلیوں کی مانند جھاڑا۔ لیکن تمام نہ جھڑے… کچھ اُن کے کپڑوں اور بالوں سے چمٹے رہے۔ دو تو اپنے منھوں میں اُن کے کانوں کی لویں لیے خوف ناک بُندوں کے جوڑے کی طرح لٹکے ہوئے تھے۔

 اُنھوں  نے دوڑنا شروع کیا تو اُنھیں محسوس ہوا کہ آہستہ آہستہ کیچڑ کی چپک ختم ہو رہی ہے۔ بھاگتے بھاگتے اُنھوں نے اپنا جسم جھٹکا، اپنے کپڑے پھاڑ ڈالے اور بدن دونوں ہاتھوں سے نوچ ڈالا۔ ہر بار مینڈک ہاتھ میں آنے پر اُن کی چیخ نکلی۔ وہ اُن مینڈکوں کو دُور پھینکتی چلی گئیں۔ اپنے کانوں سے شیر خوار بچّوں کی مانند چمٹے ہوئے دونوں مینڈکوں کو اُنھوں نے کھینچ کر اُتارا تو وہ اپنے ساتھ جلد کا کچھ حصہ بھی لے گئے۔

خالہ چلاتی اور دوڑتی رہیں لیکن وہ اپنے آپ کو اُس رینگے والے جتھے سے آزاد نہیں کروا سکیں اور جب وہ دیکھنے کے لیے مُڑیں تو نظارے نے اُن کی تقریباً جان نکال دی۔ اُن کے عقب میں ہزاروں لاکھوں مینڈکوں کی ٹرٹراتی، اُچھلتی کُودتی، ایک دُوسرے سے ٹکراتی، ایک دُوسرے کے کندھے سے کندھا جوڑے ہوئے ایک عظیم الشّان فوج موجود تھی جیسے کوئی کالا سیاہ طوفان دِیوانہ وار اُن کی طرف بڑھ رہا ہو۔ اُن کے دوڑنے کے دوران راستے کے اطراف کے مینڈک اُن کا راستہ روکنے کے راستے پر کُودتے رہے اور باقی نرسلوں کے عقب سے چھلانگیں لگا کر انفرادی حملے کرتے رہے۔

اُنھوں نے ہمیں بتایا کہ اُس رات وہ سیاہ رنگ کا ڈھیلا ڈھالا ریشمی لباس زیب تن کیے ہوئے تھیں جو مینڈکوں کے حملوں میں دھجی دھجی ہو گیا۔ اُن حملہ آور مینڈکوں نے ریشم کی دھجیاں تک نگل لیں جنھیں وہ اضطرابی حالت میں اپنے گال نوچتے ہوئے پھینکتی رہی تھیں اور وہ زمین پر لڑھکنیاں کھاتے ہوئے اپنے سفید سفید پیٹ دِکھاتے رہے۔

وہ  تمام راستے کسی دریا کے کنارے بھاگتی رہیں کہ اُنھیں وہاں چاندنی میں نہایا ہوا پتھّروں کا ایک پُل دِکھائی دیا۔ اُس وقت تک اُن کے بدن پر لباس کی ایک کترن تک نہیں بچی تھی اور جب وہ مکمل عریاں حالت میں پُل پر پہنچیں تو اُنھوں نے ہاؤ داشو کو دیکھا۔ اُس وقت اُنھیں شرم و حیا کا خیال تک نہیں رہا اور نہ ہی اُنھیں پتا تھا کہ وہ عریاں ہیں۔ اُنھوں نے چِیڑ کے درخت کی چھال کی برساتی، شال اور بانس جیسے لمبا ہَیٹ پہنے ایک شخص کو پُل کے وسط میں اپنے ہاتھوں میں کسی شے کو بھینچتے ہوئے دیکھا۔

’’مجھے بعد میں معلوم ہوا کہ وہ گندھی ہوئی مٹی کا لوتھڑا بھینچ رہا تھا۔ ایک مہ زادہ چاندنی میں نہائی ہوئی ُندھی مٹی ہی سے بنایا جا سکتا ہے۔ مجھے معلوم نہیں تھا کہ وہ کون ہے اور مجھے اِس چیز کی پرواہ بھی نہیں تھی۔ وہ جو کوئی بھی ہوتا میرا نجات دہندہ ہوتا۔‘‘

وہ دوڑ کر اُس شخص کی آغوش میں جا گریں اور اُس کی شال میں دبک گئیں اور جب اُن کے پستان اُن کی پشت کے مینڈکوں کی گیلی چپچپاہٹ اور سرد بدبُو کے برعکس اُس کے گرم گرم سینے سے ٹکرائے تو وہ چِلّا اُٹھیں۔ ’’بڑے بھائی، مجھے بچا لو!‘‘ اُس کے بعد وہ فوراً بے ہوش ہو گئیں۔