اس کا چیف بھی سیل نمبر ایک سے خوفزدہ دکھائی دیتا تھا۔جب نامابیا اور اس کے ساتھی پینٹ کی پلاسٹک کی خالی بالٹیوں میں پانی خریدنے کی استطاعت رکھتے تو باہر نہانے کی اجازت ملتی۔ ایک سپاہی ان کی نگرانی کرتا۔ اور عموماً چلاتا رہتا ۔ ’’ رک جاؤ، باز آ جاؤ ۔ ورنہ تمھیں سیل نمبر ایک میں بھیج دیا جائے گا۔‘‘ نامابیا کو سیل نمبر ایک کے بارے میں ڈراؤنے خواب دکھائی دیتے۔وہ اپنے سیل سے بدتر جگہ کا سوچ بھی نہیں سکتا تھا۔جو اتنی گنجان آباد تھی کہ عموماً وہ دیوار کے ساتھ چپکا کھڑا ہوتا تھا۔ دیوار کی دراڑوں میں کھٹمل رہتے، وہ بہت سخت کاٹتے اور جب وہ چیختا تو سیل کے ساتھی اسے نازک اندام یا پھر یونیورسٹی بوائے کہتے۔

ان سب کو اپنے ۔ پہلوؤں پر سر سے پاؤں تک سونا پڑتا۔ صرف چیف ہی پوری کمر زمین کے ساتھ لگا کر سو سکتا تھا۔ صرف چیف کو گاری (نائیجرین ڈِش) اور سوپ ملتا تھا۔ نامابیا نے پہلے ہفتے میں ہمیں یہ سب کچھ بتایا تھا۔ جب وہ بتا رہا تھا تو میں حیران ہو رہی تھی کہ اس کے چہرے پر کیڑوں کے کاٹنے کے نشان ہیں یا کوئی انفیکشن ہے۔ ان میں سے کچھ میں کریمی رنگ کی پیپ تھی۔ اس نے انھیں نو چتے ہوے بتایا کہ آج ٹوائلٹ بھرا ہوا تھا۔ وہ اسے صرف ہفتے کے دن صاف کرتے ہیں،اس لیے مجھے کھڑے کھڑے واٹر پروف بیگ میں فارغ ہونا پڑا۔

اس کا لہجہ فنکارانہ تھا۔ میں اسے چپ کرانا چاہتی تھی کیوں کہ وہ اپنی بے عزتی کا شکار ہونے والے اپنے کردار سے لطف اندوز ہو رہا تھا۔ وہ سمجھ نہیں پا رہا تھا کہ وہ کتنا خوش قسمت تھا کہ سپاہی اسے باہر آ کر ہمارے ساتھ کھانا کھانے کی اجازت دے رہے تھے۔ اس رات باہر رہ کر شراب پینا کتنی بڑی بے وقوفی تھی۔ اس کے آزاد ہونے کے امکانات کتنے کم تھے۔

پہلے ہفتے ہم ہر روز اس سے ملاقات کے لیے جاتے رہے۔ ہم والد کی گاڑی میں جاتے تھے کہ والدہ کی گاڑی اس سے بھی پرانی تھی، اور اسے ہمارے کیمپس سے باہر لے کر جانا محفوظ نہیں تھا۔ جب ہم سڑک پر پولیس چوکی سے گزرتے تو میں محسوس کرتی کہ میرے والدین کچھ مختلف ہوتے، کچھ پراسرار سے طریقے سے مختلف۔ میرے والد نے پولیس کی جہالت اور کرپشن پر خود کلامی بالکل بند کر دی تھی۔

جیسے ایک دفعہ پولیس نے اس بس کو جس میں میری خوبصورت کزن سفر کر رہی تھی روک لیا تھا، اسے باہر نکالا، اسے فاحشہ کہا کیوں کہ اس کے پاس دو سیل فون تھے۔ اس سے اتنی زیادہ رقم کا مطالبہ کیا کہ وہ بارش میں گھٹنوں کے بل زمین پر بیٹھ کر ان سے اسے جانے دینے کی بھیک مانگنے لگی۔اس کی بس کو اس کے بغیر ہی بھیج دیا گیا تھا۔ میری والدہ نے بھی بڑبڑانا چھوڑ دیا تھا۔ یہ گھبراہٹ کی علامات تھیں۔ اب میرے والدین خاموش ہو گئے تھے، شاید حسب معمول تنقید نہ کر کے وہ نامابیا کو جلد چھڑا لیں گے۔

فرقوں کا مسئلہ بہت سنجیدہ ہو چکا تھا۔ ابوجا میں حکام بالا تمام واقعات کا جائزہ لے رہے تھے۔ ہر شخص اس معاملے میں اپنے آپ کو مصروف دکھانا چاہتا تھا۔

دوسرے ہفتے میں نے اپنے والدین کو نامابیا کی ملاقات کے لیے جانے سے منع کر دیا۔ہمیں نہیں معلوم تھا کہ یہ سب کچھ کب تک چلے گا۔ پیٹرول اتنا مہنگا تھا کہ روزانہ تین گھنٹے گاڑی چلانا ممکن نہیں تھا۔ اور نہ نامابیا کو ایک دن خود اپنے بھروسے گزارنا مشکل تھا۔

والد نے میری بات سن کر مجھے حیران ہو کر دیکھا اور پوچھا۔ ”تم کیا کہنا چاہتی ہو؟‘‘

والدہ نے مجھے سر سے پاؤں تک دیکھا اور یہ کہتے ہوے دروازے کی طرف بڑھ گئی۔ ”کوئی بھی مجھے ساتھ لے جانے کے لیے مجبور نہیں کرے گا۔ میں یہاں بیٹھی رہوں اور کچھ بھی نہ کروں، جبکہ میرا بھائی مصیبت میں ہے۔‘‘  وہ کار کی طرف جا رہی تھی،جب میں باہر پہنچی تو مجھے کچھ سمجھ نہیں آئی کہ میں کیا کروں، میں نے اگزورا کی جھاڑی کے پاس سے پتھر اٹھایا اور اسے کار کی سکرین پر دے مارا۔ سکرین پر لکیریں پڑ گئیں شیشہ تڑخنے کی آوازیں سنائی دیں۔ میں واپس مڑی اور بھاگ کر اوپر اپنے کمرے میں جا کر کمرہ مقفل کر لیا۔ تا کہ والدہ کے غصے سے بچ سکوں۔ لیکن کار سٹارٹ ہونے کی آواز سنائی نہ دی۔ اس طرح اس دن نامابیا کو ملنے کوئی نہیں گیا۔ میں اپنی چھوٹی سی جیت پر بہت حیران ہوئی۔

اگلے دن جب ہم ملاقات کے لیے گئے تو ہم نے ونڈ شیلڈ کے بارے میں کوئی بات نہیں کی، اگرچہ لکیریں برف سے جمی ندی پر بننے والی لہروں کی طرح پھیلی ہوئی تھیں۔ سپاہی نے ہم سے پوچھا کہ ہم کل کیوں نہیں آئے۔ اس نے والدہ کے جولوف چاول یاد کیے تھے۔ مجھے توقع تھی کہ نامابیا بھی پوچھے گا اور پریشان ہو گا۔ لیکن وہ عجیب و غریب سنجیدگی کا مظاہرہ کر رہا تھا۔ اس کے چہرے کے ایسے تاثرات میں نے پہلے کبھی نہیں دیکھے تھے۔اس نے اپنے چاول بھی ختم نہیں کیے۔ وہ مسلسل کسی اور طرف دیکھتا رہا۔ ایکسیڈنٹ سے متاثرہ ادھ جلی کاروں کو دیکھتا رہا۔

’’کیا مسئلہ ہے؟“ میری والدہ نے پوچھا اور نامابیا فوراً بولنا شروع ہو گیا۔ جیسے وہ پوچھے جانے کا منتظر تھا۔ اس کی آواز نہ بہت اونچی تھی نہ بہت آہستہ۔ پچھلے دن اس کے سیل میں ایک بوڑھے آدمی کا اضافہ ہوا۔ شاید وہ ستر کی دھائی کے وسط میں تھا۔ایک ناقابل ترمیم ریٹائرڈ سرکاری ملازم کی پرانی طرز کی تطہیر کے ساتھ۔ اس کا بیٹا مسلح ڈکیتی میں مطلوب تھا۔ اور جب پولیس کو بیٹا نہ مل سکا تو انھوں نے اسے بیٹے کی جگہ بند کر دیا۔ اس آدمی نے کچھ نہیں کیا تھا۔ نامابیا نے بتایا۔ ”لیکن تم نے بھی تو کچھ نہیں کیا۔“ والدہ بولیں ۔

نامابیا نے ایسے سر ہلایا جیسے وہ کچھ نہیں سمجھا تھا۔ آنے والے دنوں میں وہ مزید بجھا بجھا سا تھا۔ وہ بہت کم بولتا،جب بولتا بوڑھے کے بارے میں بولتا۔ ایک دفعہ بتایا کہ بوڑھے کے پاس نہانے کا پانی خریدنے کے لیے بھی رقم نہیں۔ کیسے دوسرے اس کا مذاق اڑاتے ہیں،یا اسے بیٹے کو چھپانے کا الزام لگاتے ہیں۔کیسے چیف اسے نظرانداز کرتا ہے۔ کیسے وہ خوفزدہ دکھائی دیتا ہے۔

’’ کیا اسے معلوم ہے کہ اس کا بیٹا کدھر ہے؟‘‘  والدہ نے پوچھا۔

’’اس نے پچھلے چارماہ سے بیٹے کو نہیں دیکھا۔“ نامابیا نے بتایا۔

میرے والد نے کہاکہ اس سے کوئی فرق نہیں پڑتا کہ وہ بیٹے کے بارے میں جانتا ہے یا نہیں۔

’’بے شک۔“والدہ بولی۔ ’’یہ غلط ہے لیکن پولیس یہی کچھ کر رہی ہے۔اگر انھیں مطلوبہ شخص نہیں ملتا تو وہ اس کے باپ، ماں یا کسی بھی رشتہ دار کو اٹھا لیں گے۔‘‘

والدنے اپنے گھٹنے پر کسی چیز کو جھاڑا، یہ بے چینی کا اشارہ تھا۔

نامابیانے بتایاکہ وہ شخص بیمار ہے۔اس کے ہاتھ سوتے ہوئے بھی کانپتے ہیں۔

میرے والدین خاموش ہوگئے ۔ نامابیا نے کھانے کے برتن سمیٹے اور باپ کی طرف مڑا۔ میں یہ کھانا اسے دینا چاہتا ہوں۔ لیکن اگر میں اسے سیل کے اندر لے کر گیا تو جنرل اباچہ لے لے گا۔

میرے والداٹھ کرڈیوٹی پر موجود سپاہی کے پاس گئے۔ اور اس سے پوچھا کہ کیا ہم اس بوڑھے شخص سے کچھ منٹوں کے لیے ملاقات کر سکتے ہیں۔

وہ سپاہی تلخ زبان شخص تھا،اس نے کبھی بھی والدہ کا اس رقم اور کھانے کا شکریہ ادا نہیں کیا جو وہ اسے رشوت میں دیتی تھی۔ اب اس نے میرے والد کو طنزیہ انداز سے دیکھا اور کہا۔ ’’نامابیا کو باہر آنے کی اجازت دینے پر اس کی نوکری جا سکتی ہے اور اب ہم ایک اور شخص کو باہر بلانا چاہتے ہیں؟ کیا تم اسے بورڈنگ سکول کا ملاقات کا دن سمجھتے ہو؟ یہ کیوں نہیں سمجھتے کہ یہ معاشرے کے مجرم افراد کو قید کرنے کی سخت حفاظتی جگہ ہے۔‘‘ میرے والد آہ بھرتے ہوے واپس آ کر بیٹھ گیا اور نامابیا اپنے چہرے پر کیڑوں کے کاٹنے سے بننے والے ابھاروں کو کھرچنے لگا ۔

اگلے دن نامابیا نے اپنے چاولوں کو ہاتھ تک نہیں لگایا۔ اس نے بتایا کہ سپاہیوں نے سیل کی دیواروں اور فرش پر دھلائی والا پانی پھیلایا تو بوڑھا آدمی جو پانی خریدنے کی استطاعت نہیں رکھتا تھا۔ جو ہفتے بھر سے نہایا نہیں تھا، وہ سیل کے اندر گیا، قمیض اتاری اور اپنی کمزور کمر اس دھلائی والے پانی سے سے گیلے فرش پر رگڑی۔ اسے ایسا کرتے دیکھ کر سپاہی ہنسنے لگے۔ اسے سارے کپڑے اتار کر سیل سے باہر راہداری میں پریڈ کرنے کا کہا۔ جب اس نے ایسا کیا تو وہ اور بھی زور زور سے ہنسنے لگے اور پوچھا،کیا اس کا ڈاکو بیٹا جانتا ہے کہ اس کے پاپا کے اعضاء تناسل اتنے سکڑ گئے ہیں۔

یہ سب سناتے ہوے نامابیا اپنے رنگدار چاولوں کو گھور رہا تھا۔ جب اس نے اوپر دیکھا تو میں نے بھائی کی آنکھیں آنسوؤں سے بھری پائیں— میرا دنیا دار بھائی— میں نے اس کے لیے دل میں ایسا گدا ز محسوس کیا۔جو میں پوچھے جانے پر بھی کبھی وضاحت نہیں کر سکتی۔

دو دن بعد کیمپس پر ایک اور فرقہ کا حملہ ہوا۔ایک لڑکے نے دوسرے لڑکے کو شعبہ موسیقی کی عمارت کے سامنے کلہاڑی سے کاٹ ڈالا۔

’’یہ اچھا ہوا۔‘‘ جب میرے والدین نسوکہ پولیس سٹیشن دوبارہ جانے کے لیے تیار ہو رہے تھے تو میری والدہ نے کہا۔ ”وہ اب یہ نہیں کہہ سکتے کہ وہ فرقہ کے تمام لوگوں کو گرفتار کر چکے ہیں۔‘‘

اس دن ہم اینو گو نہیں جا سکے کہ والدین کا سارا وقت پولیس سپرنٹنڈنٹ کے پاس گزر گیا۔ لیکن وہ ایک اچھی خبر کے ساتھ واپس آئے کہ نامابیا اور بار مین دونوں کو رہا کر دیا جائے گا۔ فرقہ کے لڑکوں میں سے ایک مخبر بن گیا تھا اس نے اصرار کیا کہ نامابیا کسی فرقے کا رکن نہیں تھا۔ ہم اگلی صبح روزمرہ سے جلدی بغیر جولوف چاول لیے گھر سے نکل گئے۔ سورج کی حدت اتنی زیادہ تھی کہ کار کی ساری کھڑکیاں بند کرنی پڑیں۔

والدہ ہمیشہ سفر کے دوران نچلی نہیں بیٹھتی تھی، والد کو اس طرح ہدایات دیتی رہتی تھی جیسے انھیں دوسری طرف سے آنے والی گاڑیوں کا خطرناک موڑ لینا دکھائی نہیں دے رہا ہوتا۔ لیکن اس دفعہ وہ مسلسل کہہ رہی تھی۔ ’’باہر دیکھو!“۔ جب ہم نویں میل (جگہ کا نام ) پہنچے، جہاں پھیری والوں نے اوکپا (نائیجرین کھانا)،ا بلے ہوئے انڈے، کاجو وغیرہ اپنے تھا لوں میں بھرے گاڑی کو گھیر لیا۔ والد نے گاڑی روکی اور تلخی سے بولے۔ ”گاڑی کون چلا رہا ہے؟‘‘

پولیس سٹیشن کے وسیع احاطے کے اندر دو سپاہی کسی شخص کو کوڑے مار رہے تھے، جو چھتری نما درخت کے نیچے زمین پر لیٹا تھا۔ پہلے پہل میرا دل ہول گیا کہ کہیں یہ نامابیا تو نہیں، لیکن یہ وہ نہیں تھا۔میں زمین پر لیٹے لڑکے کو جانتی تھی، جو سپاہی کے کوڑے کی ہر ضرب کے ساتھ چیخ چلا رہا تھا۔ اسے ابوائے کہا جاتا تھا۔ اس کا چہرہ کسی شکاری کتے جیسا سنگین اور بدصورت تھا ۔ کیمپس میں لیکسز (Lexus) چلاتا تھا۔ کہا جاتا تھا کہ وہ ’’بحری ڈاکو‘‘ فرقے سے ہے۔ میں نے کوشش کی کہ سٹیشن میں داخل ہوتے ہوئے اس کی طرف نہ دیکھوں۔

ڈیوٹی پر موجود سپاہی کے چہرے پر اس کے قبیلے کا نشان تھا، جو ہمیشہ ہم سے رشوت لیتے ہوئے، ”آپ پر خدا کی رحمتیں ہوں۔“ کہتا تھا، نے ہمیں دیکھ کر منھ پھیر لیا۔ میرے رونگٹے کھڑے ہو گئے۔ مجھے محسوس ہوا کچھ بہت غلط ہے۔ والدین نے اسے سپرنٹنڈنٹ کا رقعہ پکڑایا۔ سپاہی نے اسے دیکھا بھی نہیں۔وہ آزادی کے پروانے کے بارے میں جانتا تھا۔ اس نے والد کو بتایا کہ ’’بار مین‘‘  آزاد کیا جا چکا ہے۔ لیکن لڑکے کے معاملے میں کچھ پیچیدگی ہے۔

والدہ نے چلانا شروع کر دیا۔ ”لڑکا!کیا مطلب ہے؟ میرا بیٹا کدھر ہے؟‘‘

سپاہی کھڑا ہو گیا۔ ”میں اپنے سینیئر کو بلاتا ہوں، وہی آپ کو وضاحت دے گا۔‘‘

والدہ نے بھاگ کر اسے قمیض سے کھینچا۔ ”میرا بیٹا کہاں ہے؟ میرا بیٹا کہاں ہے؟‘‘  میرے والد نے والدہ کو پرے ہٹایا۔ سپاہی نے اپنی قمیض جھاڑی، جیسے اس کی قمیض پر والدہ نے مٹی لگا دی ہو۔

’’ہمارا بیٹا کہاں ہے؟‘‘  والد نے انتہائی پرسکون لیکن مضبوط آواز میں پوچھا۔

سپاہی رک گیا اور بولا۔ ’’وہ اسے لے گئے ہیں،جناب!‘‘

’’وہ اسے لے گئے۔‘‘  والدہ نے مداخلت کی۔وہ ابھی تک چیخ چلا رہی تھی۔

’’تم کیا کہہ رہے ہو؟ کیا تم نے میرے بیٹے کو مار دیا ہے؟ کیا مار دیا ہے؟  کدھر ہے وہ؟‘‘

میرے والد نے پہلے جیسی مضبوط آواز میں پوچھا۔ ”ہمارا بیٹا کہاں ہے؟“